Uorren Baffetin investisiya nəhəngi “Berkshire Hathaway” üçüncü rüb üzrə 10Q maliyyə hesabatını təqdim edib. Sənəddə bildirilir ki, şirkətin balansındakı nağd vəsaitin həcmi rekord səviyyəyə — 381,7 milyard dollara çatıb. Bu, əvvəlki rüblə müqayisədə 37,6 milyard dollar çoxdur.
Artımın səbəbi ondan ibarətdir ki, “Berkshire Hathaway” artıq 12 rübdür ardıcıl şəkildə daha çox səhm satır, nəinki alır. Nəticədə şirkətin səhm portfeli 283,2 milyard dollara enib.
“Apple”, “American Express” və “Bank of America” şirkətlərinin səhmləri “Berkshire” portfelində ən böyük paya malikdir.
“Berkshire Hathaway” — iqtisadiyyatın müxtəlif sahələrində fəaliyyət göstərən diversifikasiya olunmuş konqlomeratdır, buna görə də bir çox investorlar onun nəticələrini ABŞ iqtisadiyyatının kiçik modeli kimi dəyərləndirirlər.
Şirkətin III rübdə gəliri cəmi 2% artıb, bu isə ölkənin ÜDM artım tempindən geri qalır. “CFRA Research” analitiki Keti Seyfert hesab edir ki, bu, “Berkshire” səhmləri üçün zəif perspektivlərə işarə edir.
İqtisadi qeyri-müəyyənlik və istehlakçı etimadının azalması şirkətin portfelindəki bir sıra brendlərin satışlarını zəiflədir, məsələn, “Clayton Homes” tikinti şirkətində, “Duracell” batareyalarında, “Fruit of the Loom” geyim markasında və “Squishmallows” (Jazwares) oyuncaqlarında.
Bundan əlavə, “Berkshire Hathaway” 2024-cü ilin II rübündən bəri səhmlərinin geri alışını həyata keçirməyib, bu da şirkətin göstəricilərinin S&P 500 indeksindən geri qalmasını qismən izah edir.
