Azertag saytından verilən məlumata görə, ain.az xəbər verir.
Vaşinqton, 6 noyabr, AZƏRTAC
ABŞ Qəzzada sabitləşdirmə qüvvələri layihəsini BMT Təhlükəsizlik Şurasına bu gün təqdim edəcək. AZƏRTAC-ın “Associated Press”ə istinadən verdiyi məlumata görə, bu barədə ABŞ rəsmisi açıqlama yayıb. Bildirilir ki, layihə əsasında Prezident Donald Trampın İsrail və HƏMAS arasındakı müharibəni dayandırmaq planının növbəti addımı kimi bu qüvvələrə ən azı iki il müddətinə mandat verilməsi nəzərdə tutulub.
Misir, Qətər, Səudiyyə Ərəbistanı, Türkiyə və Birləşmiş Ərəb Əmirliklərinin nümayəndələri dəstək üçün ABŞ-a qoşulacaqlar.
Layihədə, həmçinin qüvvələrin Qəzza zolağının silahsızlaşdırılması prosesini aparması və qeyri-dövlət silahlı qrupların tərkisilah edilməsini təmin etməsi nəzərdə tutulur.
Təhlükəsizlik Şurasının qapalı iclası hələlik elan olunmayıb. Onun yerli vaxtla axşam saatlarında (Bakı vaxtilə noyabrın 6-sı gecə saatlarında) keçirilməsi gözlənilir.
Məlahət Nəcəfova
AZƏRTAC-ın xüsusi müxbiri
Vaşinqton
Sonrakı hadisələr barədə daha çox məlumat almaq üçün ain.az saytını izləyin.
