Zaporojye cəbhəsində son saatların dinamiki dəyişiklikləri beynəlxalq analitiklərin diqqətini yenidən bu istiqamətə yönəldib.
Musavat.com xəbər verir ki, Almaniyanın məşhur BILD qəzetinin hərbi müşahidəçisi Julian Röpcke Rusiya qüvvələrinin Zaporojyedə əsas müdafiə xəttinin bir hissəsini cəmi iki saat ərzində keçməsini bölgədə Ukrayna müdafiəsinin ciddi şəkildə zəifləməsi kimi qiymətləndirib.
Röpckenin məlumatına görə, Rusiya ordusunun irəliləmə tempi bu istiqamətdə 4 kilometrə çatıb. Onun fikrincə, bu dinamika ön xəttin dayanıqlığını sual altına qoyur və Ukrayna komandanlığını “operativ qərarların ilkin deyil, təcili mərhələsinə” gətirir.
Müşahidələr göstərir ki, Zaporojyedə meşəlik ərazinin ələ keçirilməsi Rusiya üçün kommunikasiya və müşahidə üstünlüyü yaradıb. Dronların və artilleriyanın daha geniş sahəyə çıxışı bu istiqamətdə Ukraynanın müdafiə yükünü artırır. Cəbhə boyunca bir neçə ehtiyat xətt olsa da, hücumun sürəti onların tam şəkildə aktivləşdirilməsinə imkan vermir.
Ukrayna hərbi mənbələri Zaporojyedə vəziyyətin ağır olmasını təsdiqləsələr də, əlavə qüvvələrin rayona yönləndirildiyini qeyd edirlər. Bununla belə, qərb analitikləri yaxın günlərin bu istiqamət üçün həlledici ola biləcəyini bildirirlər.
Julian Röpcke də xatırladır ki, cəbhənin bu hissəsi təkcə taktiki deyil, həm də psixoloji əhəmiyyət daşıyır. Zaporojyenin qorunması cənub müdafiə sisteminin davamlılığı üçün vacib hesab olunur.
Hazırkı mərhələdə hər iki tərəf artan döyüş sıxlığını təsdiqləyir. Gözlər qarşıdakı günlərdə Ukraynanın hansı addımları atacağına yönəlib.
Musavat.com
