Kremlin sözçüsü Dmitri Peskov Rusiyanın sülh istədiyini, lakin Ukraynanın danışıqlara qapını bağladığı üçün "xüsusi hərbi əməliyyatını" davam etdirəcəyini söylədi.
Peskov Moskva jurnalistlərinin suallarını cavablandırıb. ABŞ dövlət katibi Marko Rubionun Rusiyanın sülh istəməməsi ilə bağlı açıqlamasına münasibət bildirən Peskov deyib: "Biz razı deyilik. Rusiya həqiqətən sülh istəyir və Ukrayna məsələsinin siyasi və diplomatik yollarla həllinə açıqdır".

Ukraynanın diplomatik səyləri çətinləşdirdiyini qeyd edən Peskov deyib: "Kiyev rejimi danışıqlara qapını bağlayıb. Buna görə də xüsusi hərbi əməliyyatımızı davam etdirəcəyik. Əsas məqsədimiz təhlükəsizliyimizi və maraqlarımızı təmin etmək, gələcək nəsillər üçün təhlükəsizliyimizi qorumaq və qarşımızda duran vəzifələri yerinə yetirməkdir".

Peskov qeyd edib ki, Ukrayna "gec-tez" Rusiya ilə danışıqlar masasına qayıdacaq.

ABŞ prezidenti Donald Trampın ölkəsinin "nüvə sınaqlarına" başlayacağı ilə bağlı açıqlamalarına gəldikdə, sözçü Peskov deyib: "Nüvə silahı sınaqlarının başlanması uzun müddətdir qüvvədə olan qadağanın dayandırılacağı deməkdir. Rusiya prezidenti Vladimir Putinin dəfələrlə bildirdiyi kimi, bu halda Rusiya buna uyğun hərəkət edəcək".

Rusiya: Ukraynanın Xarkov və Dnepropetrovsk vilayətlərində iki yaşayış məntəqəsini ələ keçirdik
Rusiya Müdafiə Nazirliyi Ukraynanın Xarkov və Dnepropetrovsk vilayətlərində iki yaşayış məntəqəsini ələ keçirdiklərini açıqladı.

Nazirlik Rusiya Silahlı Qüvvələrinin Ukraynadakı hərəkətləri ilə bağlı açıqlama yaydı.

Bəyanatda Rusiya qüvvələrinin Ukraynadakı bütün cəbhələrdə mövqelərini gücləndirdiyi qeyd edildi. "Qətiyyətli hərəkətləri nəticəsində Şimal və Şərq hərbi qruplaşmalarının bölmələri Xarkov bölgəsindəki Sinelnikovo yaşayış məntəqəsini və Dnepropetrovsk bölgəsindəki Danilovka yaşayış məntəqəsini azad etdilər."

Nazirlik dünən Donetsk bölgəsindəki Suxoy Yar yaşayış məntəqəsini nəzarətə götürdüklərini açıqladı.

Rusiya: Moskva da daxil olmaqla müxtəlif bölgələrdə 130 Ukrayna pilotsuz təyyarəsini məhv etdik
Rusiya Müdafiə Nazirliyi Moskva da daxil olmaqla müxtəlif bölgələrdə hava hücumundan müdafiə sistemləri tərəfindən 130 Ukrayna pilotsuz uçuş aparatının (PUA) məhv edildiyini bildirdi.

Nazirlik Ukrayna ordusunun Rusiya ərazisinə pilotsuz hücum təşkil etdiyini bildirdi.

Bəyanatda qeyd olunur ki, dünən saat 23:00-dan bu gün saat 8:00-dək hava hücumundan müdafiə sistemləri tərəfindən 130 PUA məhv edilib. Bildirilib ki, bunlar Moskva da daxil olmaqla bir neçə bölgədə və Qara dəniz üzərində vurulub.

Bu arada, Rusiyanın Oryol vilayətinin qubernatoru Andrey Klıçkov öz Telegram kanalında bölgədəki bir neçə evin pilotsuz təyyarənin zərbəsi nəticəsində zərər gördüyünü açıqlayıb.

Klıçkov hadisə yerində lazımi işlərin davam etdiyini və itki olmadığını bildirib.

aia.az
Tərcümə şöbəsi

• Rusiya
• Əməliyyat
• Ukrayna
• Danışıqlar