Ümumdünya Səhiyyə Təşkilatı (ÜST) büdcənin azaldılması ilə əlaqədar 1282 əməkdaşını ixtisar edəcək.
Yeniavaz.com xəbər verir ki, bu barədə təşkilatın baş direktoru Tedros Adanom Qebreyesus ÜST-yə üzv ölkələr üçün keçirilən brifinqdə bildirib.
O, 2026-2027-ci illər üçün azaldılmış büdcənin qəbul edilməsi ilə zəruri olan yenidən təşkilatlanma prosesinin demək olar ki, tamamlandığını və son addımın yenidən yerləşdirmə ilə bağlı olduğunu qeyd edib.
“Bu proses boyu məqsədimiz təşkilatın əsas funksiyalarını qorumaq, maliyyə və insan resurslarımızı bu funksiyalarla uyğunlaşdırmaq, eyni zamanda ixtisarları mümkün qədər minimuma endirmək idi. Əgər bu yanaşmanı qəbul etməsəydik, təxmin edirik ki, dünya üzrə təxminən 2900 işçini ixtisar etməli olacaqdıq”, - ÜST rəhbəri qeyd edib.
Qebreyesus həmçinin qeyd edib ki, bu, konkret olaraq 1089 əməkdaşın təqaüdə çıxması və ya ÜST-dən başqa işə keçməsi nəticəsində mümkün olub.
Təxminən 600 vəzifə hökumətlərin üzvlük haqlarını artırması sayəsində qorunub saxlanılıb.
Baş direktor 2026-2027-ci illər üçün 1 milyard dollarlıq büdcə boşluğunun aradan qaldırılması üçün yardıma çağıraraq, ÜST-nin yenidən təşkili prosesinə üzv dövlətlərin davamlı dəstəyinə ümid etdiyini bildirib.
Qeyd edək ki, 2025-ci ilin may ayında ÜST-yə üzv ölkələr ən böyük donorlardan biri olan ABŞ-nin təşkilatdan çıxmaq qərarından sonra 2026-2027-ci illər üçün 5,3 milyard dollarlıq ilkin büdcəni 4,2 milyard dollar həcmində qəbul ediblər.
