BAKI, 21 noyabr. TELEQRAF
“Caspian International” Hospitalda bir qrup vəzifəli şəxsin mama-ginekoloq Aytən Səfərovanın bank hesabına köçürülmüş vəsaiti oğurlaması barədə Teleqraf-ın dərc etdiyi özəl məlumata klinikadan nəhayət ki, cavab verilib.
Məlumat yayımlanmazdan öncə klinikaya sorğu ünvanlamışdıq. Lakin müxtəlif səbəb və bəhanələrlə sorğuya cavab verilmirdi.
Dərc edilən məlumat ölkə gündəmində geniş müzakirəyə çevrildikdən sonra klinika açıqlama vermək zərurəti hiss etdi. Amma açıqlama oğurluq hadisəsinin baş verib-verməməsindən daha çox həkim Aytən Səfərovanı hədəfə alıb.
Klinikadan bildirilib ki, Aytən Səfərova klinikada fasilələrlə uzun müddət çalışıb. Sonuncu əmək müqaviləsi 01.09.2023-cü il tarixində bağlanıb.
Açıqlamanı olduğu kimi təqdim edirik: “Lakin Aytən Səfərova haqqında pasiyentlərdən çoxsaylı şikayətlər olduğu və sonsuzluğun müalicəsində effektivliyin azaldığı, habelə pasiyentlərə qarşı hörmətsiz yanaşdığı nəzərə alınaraq 11.12.2024-cü ildə əmək müqaviləsinə xitam verilib.
Nəzərinizə onu da çatdıraq ki, Aytən Səfərovanın bir çox pasiyenti müalicədən qeyri-məmnun qaldığı üçün ödəniş etməkdən imtina etmiş, nəticədə klinikaya olunmalı ödənişləri hələ də borc olaraq qalmaqdadır. O cümlədən, pasiyentlər dəfələrlə hüquq-mühafizə orqanlarına və Analitik Tibbi Ekspertizaya həkim Aytən Səfərovadan şikayətlər edib. Hətta bir neçə pasiyent intihar etmə həddinə çatıb. Onlardan — üzərinə benzin töküb özünü yandırmağa cəhd edən də olub”, – deyə qeyd edilib.
Eyni zamanda vurğulanıb ki, Aytən Səfərovanın dolayı yollarla klinikaya qayıtmaq üçün etdiyi müraciətlər rəhbərlik tərəfindən müsbət dəyərləndirilməyib, işə bərpa olunması uyğun görülməyib.
Aytən Səfərova ilə əmək müqaviləsinə xitam verildikdən təqribən 10 ay sonra, 2025-ci ilin sentyabr ayında klinika rəhbərliyinə zəng edən və özünü Aytən Səfərovanın vəkili kimi təqdim edən şəxs 11 000 manat vəsaitin kartından oğurlandığını iddia edib. Üzərindən 10 ay keçdikdən sonra guya necə olubsa, sonuncu kartında vəsaitin olmadığı qənaətinə gəlib. Vəkil məsələnin aydınlaşdırılması üçün klinikaya dəvət olunsa da, görüşdən imtina edib və Aytən Səfərovanın bu görüşə icazə vermədiyini bildirərək, klinikanı məhkəməyə verməklə hədələyib. Hazırda bu məsələ hüquqi müstəvidə araşdırılır”.
Açıqlamanı olduğu kimi təqdim etdik. Buradan da başa düşülür ki, klinika bu məlumatların yayılmasında Aytən Səfərovanı ittiham edir. Aytən Səfərova isə klinikanı ittiham edir. Klinika açıqlamasında qeyd edir ki, Aytən Səfərova ilə uzun müddət əməkdaşlıq edib. Maraqlıdır ki, çoxsaylı şikayətlər olduğu halda bu əməkdaşlıq niyə davam edib? Aytən Səfərovadan çoxsaylı şikayətlər olub.Bu barədə yerli mətbautda da məlumatlar dərc edilib. Aytən Səfərova həmin şikayətçilərlə necəsə barışıq əldə etməyi bacarıb və fəliyyətini başqa bir klinikada davam etdirir.
Amma fakt budur ki, klinikanın vəzifəli şəxsləri başqasının kart hesabında olan vəsaiti oğurlayıblar. Buna görə də cinayət işi açılıb. Aytən Səfərovanın yaxşı həkim olub-olmaması, pasiyentlərin ondan şikayət etməsi bu faktı dəyişdirmir.
Klinika açıqlamasında 11 min manatın Aytən Səfərovanın kartından oğurlanmasını qarşı tərəfin iddiası kimi təqdim edib. Amma klinika bir məsələni unudur və ya xatırlamaq istəmir. Axı klinikanın vəzifəli şəxsləri yeni kartı sifariş verərək 11 min manatı elə klinikanın həyətindəki bankomatdan nağdlaşdırıblar. Həm də bu əməliyyatı 11 dəfə icra ediblər- hər dəfə 1000 manat olmaqla...
