Rusiyada əcnəbi vətəndaşların övladlarının məktəblərə qəbulu ilə bağlı yeni qaydalar bu il kəskin nəticələr doğurub. Rusiya Rəqəmsal Təhsil Nəzarəti Xidmətinin (Rособрнадзор) rəhbəri Anzor Muzaev açıqlayıb ki, sənəd təqdim edən miqrant uşaqlarının böyük hissəsi məktəblərə qəbul olunmayıb və onların cəmi 19 faizi təhsil sisteminə daxil ola bilib. Bu, Rusiyada yaşayan on minlərlə miqrant ailəsi üçün həm sosial, həm hüquqi, həm də psixoloji çətinliklərin artması deməkdir.
Musavat.com xəbər verir ki, Muzaevin sözlərinə görə, məktəbə qəbul olunmayan uşaqların təxminən 80 faizi iki əsas tələbi yerinə yetirə bilməyib. Birinci səbəb 2025-ci ilin aprelindən tətbiq edilən yeni qaydaya əsasən, məktəbə qəbul üçün məcburi olan rus dili imtahanının verilməməsidir. Qaydalara görə, imtahanı verə bilməyən uşaqlar avtomatik olaraq siyahıdan çıxarılır. İkinci ciddi səbəb isə sənədlərlə bağlı problemlərdir. Bir çox miqrant ailəsi ölkədə qalma hüququnu təsdiqləyən sənədləri və digər zəruri arayışları təqdim edə bilmədiyi üçün uşaqlar qəbul prosedurundan kənarda qalıb.
Rəqəmlər vəziyyətin miqyasını açıq şəkildə göstərir: 23,6 min uşaq məktəbə qəbul üçün müraciət edib, onlardan yalnız 8,2 min nəfər test mərhələsinə buraxılıb və yekunda cəmi 4,5 min uşaq – yəni ümumi müraciət edənlərin 19 faizi – təhsil sisteminə qəbul olunub. Bu göstərici miqrant ailələrinin adaptasiya imkanlarının kəskin şəkildə zəiflədiyini göstərir.
Ekspertlərin fikrincə, yeni qaydalar həm miqrant uşaqları üçün təhsil imkanlarını məhdudlaşdırır, həm də bu kateqoriyadan olan ailələrin ölkəyə inteqrasiyasını çətinləşdirir. Təhsildən kənar qalan uşaqların artması isə gələcəkdə sosial adaptasiya problemlərinə, hüquqi qeyri-müəyyənliklərə və təhlükəsizlik risklərinə səbəb ola bilər. Bir sıra regionlarda miqrant ailələri üçün əlavə kvotaların tətbiqi barədə müzakirələr də gedir.
Bu nəticələr Rusiyada miqrant ailələrinin təhsil sisteminə çıxışının son illərdə ən aşağı səviyyəyə düşdüyünü göstərir və prosesin yaxın dövrdə daha da sərtləşəcəyinə dair proqnozlar var.
Musavat.com
