"Qısqanclıq həm instinkt, həm də münasibətləri qoruyan təbii siqnaldır..."
Yeni araşdırma bizi daha çox emosional xəyanətin, yoxsa sadəcə seksin incitdiyini göstərir.
Moderator.az xəbər verir ki, bu barədə "der.tagesspiegel.com" nəşri yazıb.
Seksual xəyanət və emosional bağlılıq
Nəşr yazır ki, bu, əsasən insanın cinsindən asılıdır. Bu nəticə uzun illər formalaşmış stereotipləri dəyişir və göstərir ki, qısqanclıq düşündüyümüzdən daha mürəkkəb mexanizmdir. Araşdırmaya görə, kişilər ən çox seksual xəyanətə reaksiya verir. Qadınlarda isə mənzərə daha sabitdir: onlar üçün ən sarsıdıcı olan emosional bağlılığın başqa biri ilə qurulmasıdır.
Araşdırmanın detalları
Norveç alimləri 16-80 yaş arasında 4500 insanla standartlaşdırılmış sorğu aparıb. İştirakçılara iki seçimli situasiyalar təqdim edilib, məsələn: "Hansını daha ağır qəbul edərdiniz - partnyorunuzun başqa biri ilə yatmasını, yoxsa onunla emosional bağ qurmasını?"
Nəticələr göstərib ki, xüsusilə özünü "güclü, maskulin" kimi identifikasiya edən kişilərdə qısqanclıq daha çox seksual sədaqətə yönəlib. Digər orientasiya qruplarında isə emosional xəyanət daha ciddi pozuntu kimi qəbul edilir.
Qısqanclıq instinktdirmi?
Mütəxəssislər bildirir ki, qısqanclıq yalnız psixoloji mexanizm deyil - onun təkamül funksiyası var. Tarixən kişilər "başqasının övladına resurs sərf etməkdən", qadınlar isə təhlükəsizlik və bağlılığı itirməkdən qorxublar. Bu səbəbdən qısqanclıq təbii olaraq münasibətin qorunmasına yönələn bioloji siqnal hesab olunur.
Frayburqdan olan psixoterapevt Kristian Reslerin sözlərinə görə, qısqanclığı tamamilə aradan qaldırmaq cəhdləri çox vaxt emosional tükənməyə səbəb olur: "Bu hissin kökü instinktdir. Onu tam yox etmək deyil, idarəetməyi öyrənmək lazımdır".
Qısqanclıq düşmən deyil
Mütəxəssislərin fikrincə, qısqanclıq münasibətlərdə dağıdıcı da ola bilər, qoruyucu da. Onu inkar etmək və ya repressiya etmək yerinə, hissin mənbəyini anlamaq və partnyorla açıq şəkildə danışmaq ən sağlam yanaşmadır. Yəni qısqanclıq sevginin sübutu olmasa da, münasibətin siqnal sistemidir, sadəcə onu idarə etməyi bacarmaq lazımdır.
