Çin ABŞ-dən “separatçılara yanlış siqnallar verməməyi” tələb edir…
Poliqon xəbər verir ki, Çin Xarici İşlər Nazirliyinin sözçüsü Lin Tszyan ABŞ və Tayvan arasında istənilən formada rəsmi əlaqələrin qurulmasına qarşı olduqlarını bəyan edib və Vaşinqtonu belə təmasları dərhal dayandırmağa çağırıb.
Sözçünün çıxışı “Sinhua” Agentliyi tərəfindən yayımlanıb. Çin tərəfi bəyan edir ki, ABŞ özü rəsmi olaraq Pekini Çinin yeganə qanuni hökuməti kimi tanıyır və bu çərçivədə Tayvanla yalnız qeyri-rəsmi, mədəni, ticarət və digər mülki əlaqələr saxlamalıdır.
“ABŞ Tayvan separatçılarına yanlış siqnallar göndərməməlidir”, deyə bəyanatda qeyd edilir.
Bu açıqlama ABŞ prezidenti Donald Trampın bir gün əvvəl imzaladığı yeni qanuna cavab xarakteri daşıyır. Həmin qanun Dövlət Departamentinə Vaşinqtonun Tayvanla münasibətləri tənzimləyən əsas prinsipləri mütəmadi olaraq yenidən nəzərdən keçirməyi və yeniləməyi tapşırır. Pekin bunu “Tayvan məsələsinə müdaxilə” kimi qiymətləndirir.
“Sinhua” qeyd edir ki, ABŞ-ın Tayvanla rəsmi diplomatik əlaqələri yoxdur, lakin Vaşinqton adanın ən mühüm siyasi və təhlükəsizlik tərəfdaşı sayılır. ABŞ hər il Tayvana milyardlarla dollarlıq hərbi və texniki dəstək göstərir və bu, Pekinin narazılığına səbəb olur.
Analitiklər bildirirlər ki, Tramp administrasiyasının bu addımı ABŞ-Çin münasibətlərində onsuz da gərgin olan Tayvan xəttini daha da kəskinləşdirə bilər. Pekin isə xəbərdarlıq edir ki, Vaşinqtonun atacağı “yanlış addımlar” Tayvan boğazında sabitliyi risk altına sala bilər.
Poliqon.info
