Vaşinqton Avropadan cəmi iki il ərzində NATO-dakı öhdəliklərin böyük bir hissəsini, o cümlədən kritik planlaşdırma və koordinasiya vəzifələrini öz üzərinə götürməsini istəyir.
"Cebheinfo.az" “Reuters” agentliyinə istinadən xəbər verir ki, ABŞ bu mesajı bu həftə Vaşinqtonda Pentaqon rəsmiləri ilə Avropa nümayəndə heyətləri arasında keçirilən görüşdə çatdırıb.
Amerikalı rəsmilərin Avropalı həmkarlarına Tramp administrasiyasının Avropanın müdafiə qabiliyyətini artırmaq üçün atdığı addımlardan narazı olduqlarını bildirdiyi qeyd olunur.
Verilən mesajlar arasında, əgər Avropa ölkələri 2027-ci ilə qədər alyansın ənənəvi müdafiə qabiliyyətlərini öz üzərinə götürmək üçün zəruri addımlar atmasa, ABŞ-nin NATO-nun müdafiə koordinasiya mexanizmlərində iştirakını dayandıra biləcəyi də yer alıb.
ABŞ-nin alyans çərçivəsindəki məsuliyyətlərini Avropaya ötürməsi NATO daxilində ciddi struktur dəyişikliyi anlamına gəlir. Bu bəyanat, ABŞ üçün Avropanın təhlükəsizliyinin artıq prioritet olmadığının yeni bir göstəricisi kimi qiymətləndirilir.
Ənənəvi müdafiə qabiliyyətləri raketlərdən tutmuş hərbi personal və texnikaya qədər geniş sahəni əhatə edir. ABŞ-nin Avropanın iki il ərzində əldə edəcəyi irəliləyişi hansı meyarlara əsasən qiymətləndirəcəyi hələlik bəlli deyil. Avropalı rəsmilər isə amerikalıların təklif etdiyi vaxt cədvəlinin real olmadığını vurğulayırlar.
