Bədənin suya ehtiyacı əslində mürəkkəb hesablamalara yox, təbii siqnala bağlıdır. AzPost xəbər verir ki, Rusiya Tibb Universitetinin endokrinologiya kafedrasının dosenti, neyroendokrinoloq Yuri Poteşkin KP.RU-ya açıqlamasında bildirib ki, insan orqanizmi maye çatışmazlığını hiss etdikdə beyin dərhal xəbərdarlıq edir və bu zaman susuzluq yaranır. Mütəxəssis bunu bədənin su istədiyinin “tək və ən doğru əlaməti” adlandırıb. Onun sözlərinə görə, bəzən populyar hesablamalar – məsələn, bədən çəkisinə görə gündə 35-40 millilitr su içmək qaydası – yalnız xüsusi hallarda keçərlidir və bu, daha çox təbii tənzimlənməsi olmayan pasiyentlərə, o cümlədən iflic xəstələrinə aiddir.
Həkim xəbərdar edib ki, sudan artıq içmək də fayda əvəzinə zərər verə bilər. Bəzi insanlar aclığı boğmaq və ya arıqlamağı sürətləndirmək üçün suyu normadan artıq qəbul etməyə çalışır, lakin Poteşkin bunu yanlış adlandırır. O xatırladıb ki, böyrəklər artıq mayeni normal şəkildə süzə bilir, lakin bədəni məcburi şəkildə su ilə yükləmək stress yarada bilər. Mütəxəssislər tövsiyə edir ki, əsas meyar sadədir – bədən susuzluq siqnalı göndərirsə, su içmək lazımdır; əks halda, özünü zorlamaya ehtiyac yoxdur.
