42 il əvvəl uşaq yaşlarında itkin düşən qadın ABŞ-da sağ vəziyyətdə tapılıb.
Editor.az Metro qəzetinə istinadən xəbər verir ki, 1983-cü ildə uşaqkən qaçırılan qadının kimliyi uzun illər sonra müəyyən edilib.
Məlumata görə, hazırda 46 yaşı olan Mişel Mari Nyuton 1983-cü ilin aprel ayında cəmi üç yaşında olarkən öz anası tərəfindən qaçırılıb. O, itkin düşdüyündən xəbərsiz şəkildə, bütün bu illər ərzində başqa ad altında yaşayıb.
Kentuki ştatının hüquq-mühafizə orqanlarının bildirdiyinə görə, Mişelin anası Debra Nyuton ailənin qalan üzvlərindən əvvəl Corciya ştatına köçəcəyini deyərək qızını özü ilə aparıb. Uşağın atası Cozef Nyuton daha sonra həmin ştata gəldikdə isə ana və qız artıq yoxa çıxmışdı. Jefferson dairəsinin Şerif İdarəsinin məlumatına əsasən, onlarla son əlaqə 1984–1985-ci illərdə olub.
Hadisədən sonra genişmiqyaslı axtarışlara başlanılıb, elanlar və axtarış broşürləri yayılıb. Debra Nyuton valideynlik hüquqlarına müdaxilə etməkdə ittiham olunub və daha sonra FTB-nin valideyn qaçırmaları ilə bağlı axtarış siyahısına salınıb.
2000-ci ildə yeni ipuclarının əldə olunmaması səbəbindən iş bağlanıb. 2005-ci ildə isə Mişelin adı milli itkin uşaqlar bazasından çıxarılıb. Lakin 2016-cı ildə yaxın qohumların müraciəti əsasında istintaq yenidən başladılıb və bir il sonra ana barəsində rəsmi ittiham irəli sürülüb.
İşdə dönüş nöqtəsi Debra Nyutonun Florida ştatında “Şeron Nili” adı altında yaşadığının müəyyən edilməsi olub. Cari və arxiv fotolarının müqayisəsi onun kimliyini təsdiqləyib. Debra Nyuton 24 noyabr 2025-ci ildə həbs edilib.
Mişel bildirib ki, bütün həyatı boyu saxta adla yaşadığından xəbərsiz olub və bu fakt onu dərindən sarsıdıb. Qısa müddət sonra o, atası ilə yenidən görüşüb.
“Atası onu yenidən görəndə bu, sanki ad günündə bir möcüzə ilə qarşılaşmaq kimi idi. Elə bil bir mələk idi”, – deyə Cozef Nyuton bildirib.
//Gülnarə Abasova, Editor.az
