Türkiyə Hərbi Hava Qüvvələrinə məxsus qırıcıların Yunanıstan hava məkanına daxil olması Egey dənizində gərginliyi yenidən gündəmə gətirib.
NOCOMMENT.az -ın məlumatına görə, bu barədə İstanbuldan reportyor Aydın Kərimov məlumat verib.
Son sutka ərzində Türkiyə hərbi təyyarələri bir neçə dəfə Afinanın Uçuş Məlumatı Rayonu zonasına daxil olub və Yunanıstan Milli Müdafiə Qərargahının məlumatına görə, ölkənin hava məkanını birbaşa pozublar.
Hadisələr tək-tək insidentlərdən ibarət deyil, əksinə, hava döyüşünün imitasiyasını da əhatə edən kompleks hərbi fəaliyyət müşahidə olunub. Nəticədə Yunanıstan qırıcı təyyarələrini havaya qaldırmağa məcbur qalıb.
Afinanı xüsusilə narahat edən məqam isə odur ki, bu, 2023-cü ilin fevralında Türkiyədə baş verən zəlzələlərdən sonra qeydə alınan ilk belə “hava qarşıdurmasıdır”. Həmin vaxt hər iki tərəf humanitar fəlakət fonunda hərbi fəallığı bilərəkdən azaldaraq gərginlikdən yayınmışdı.
