ain.az, 525.az portalından verilən məlumatlara əsaslanaraq xəbər verir.
ABŞ-nin Nyu-York şəhərində soyğun olub.
525.az “CBS News”a istinadən xəbər verir ki, üç silahlı və maskalı şəxs Manhettendəki bir Pokemon mağazasına basqın edib. Təcavüzkarlar vitrinləri sındırmaq üçün çəkiclərdən istifadə edərək təxminən 100 min dollar dəyərində nadir kartlar və mallar kolleksiyasını oğurlayıblar.
Nyu-York Polis Departamentinin (NYPD) və təhlükəsizlik kamerasının görüntülərinə görə, qara geyimli təcavüzkarlar mağazaya girdikdən sonra işçilərə və müştərilərə silah tuşlayıblar. Təhlükəsizlik kamerasının görüntülərində təcavüzkarlardan birinin özü ilə gətirdiyi çəkiclə vitrinləri sındırdığı, içəridəki müştərilərin isə qorxudan əllərini qaldıraraq dayandıqları görünür. Şübhəlilər mağazadan qiymətli əşyaları tez bir zamanda yığıb hadisə yerindən qaçıblar.
Mağaza sahibi Kortni Çin bildirib ki, soyğun zamanı təxminən 100 min dollar dəyərində nadir Pokemon kartları və malları oğurlanıb. Kassadan nağd pul və qadın işçinin mobil telefonu da götürülüb.
Polis hadisə zamanı heç kimin fiziki xəsarət almadığını, lakin hücum edənlərin hələ tutulmadığını bildirib. Şübhəlilərin kimliyini müəyyən etmək üçün təhlükəsizlik kamerasının görüntüləri araşdırılır.
Qeyd olunub ki, son zamanlar ABŞ-də kolleksiya kartları ilə bağlı cinayətlər əhəmiyyətli dərəcədə artıb. Dekabr ayında Kaliforniyanın Burbank şəhərindəki idman və kart mağazasından 100 min dollar dəyərində əşyalar oğurlanıb və hadisə ilə əlaqədar dörd nəfər həbs olunub. Bu ayın əvvəlində isə Qərbi Los-Ancelesdəki bir kolleksiyaçıdan silah gücü ilə 300 min dollar dəyərində Pokemon kartları oğurlanıb. Mütəxəssislərin fikrincə, nadir kolleksiya kartlarının qara bazarda minlərlə dollar qazandıra bilməsi bu tip mağaza və kolleksiyaçıları getdikcə daha cəlbedici hədəfə çevirir.
İbrahim Cəfərov
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
