Qarlı və soyuq havalar ayaqqabılara zərər verə bilər, buna görə qışlıq ayaqqabılara düzgün qulluq vacibdir.
Pravda.az bildirir ki, keyfiyyətli ayaqqabı almaq kifayət deyil, onları uzun müddət istifadə etmək üçün müəyyən qaydalara əməl etmək lazımdır.
Əsas tövsiyələrdən biri ayaqqabıları sudan qorumaqdır. Su keçirməz sprey və dərilər üçün mum tərkibli cilalar həm ayaqqabının görünüşünü qoruyur, həm də suya davamlılıq təmin edir.
Ayaqqabıları istifadə etdikdən sonra formalarını qorumaq üçün içlərinə qəlib və ya kağız qoymaq, həmçinin onları tam qurudulmuş vəziyyətdə saxlamaq vacibdir. İslanmış ayaqqabılar təkrar istifadə edilməzdən əvvəl yaxşı qurudulmalıdır ki, zədələnməsin.
Köhnə ayaqqabılara “baxım günü” verərək onları yenidən istifadəyə hazır vəziyyətə gətirmək olar: bağcıqları çıxarıb təmizləmək, ləkələri aradan qaldırmaq və qoruyucu sprey tətbiq etmək sadə və təsirli üsullardır.
Sezon bitdikdən sonra isə ayaqqabılar tozdan və nəmdən uzaq, quru yerdə saxlanmalıdır. Bu sadə qulluq addımları ayaqqabılarınızın ömrünü uzadır və onları qış havasının sərt təsirlərindən qoruyur.
Əminə Bayramova
