Apple şirkəti iPhone Air modelinin yenilənmiş versiyasını 2026-cı ildə təqdim etməyi planlaşdırır. MacRumors-un məlumatına görə, bu barədə Çinli insayder Fixed Focus Digital bildirib. Onun sözlərinə əsasən, ikinci nəsil iPhone Air hazırda aktiv hazırlıq mərhələsindədir və 2026-cı ilin payızında iPhone 18 Pro seriyası və Apple-ın gözlənilən qatlana bilən smartfonu ilə birlikdə təqdim oluna bilər.
Mənbə qeyd edir ki, yeni iPhone Air-də dəyişikliklər minimal olacaq və əsaslı dizayn yenilikləri nəzərdə tutulmur. Daha əvvəl bəzi KİV-lər zəif satışlar səbəbindən modelin 2027-ci ilə təxirə salına biləcəyini yazsa da, Bloomberg jurnalisti Mark Qurman bu məlumatları təkzib edib. Onun fikrincə, iPhone Air illik yenilənən modellər sırasında yer almır və Apple bu cihaz üçün ayrıca təqdimat strategiyası seçib.
Qurman əlavə edib ki, daha ciddi texniki yeniliklərə malik iPhone Air versiyası 2027-ci ilin yazında təqdim oluna bilər və əsas yenilik 2-nm prosessorun tətbiqi olacaq.
