Yaponiya Parlamentinin aşağı və daha nüfuzlu palatası olan Nümayəndələr Palatasının erkən ümumi seçkilərin keçirilməsi üçün buraxıldığı bildirilib.
"Cebheinfo.az" “Kyodo” agentliyinə istinadən bildirir ki, Nümayəndələr Palatası bu səhər yeni qanunverici dövrün ilk iclasında özünü buraxıb.
Normal şərtlərdə səlahiyyət müddəti 2028-ci ilə qədər davam etməli olan palatanın buraxılması təcili erkən ümumi seçki prosesini başladır.
8 fevralda keçiriləcək ümumi seçkilər üçün seçki kampaniyası 27 yanvarda başlayacaq.Yaponiyanın Baş naziri Sanae Takaiçi həftənin əvvəlində verdiyi açıqlamada Nümayəndələr Palatasının erkən keçirilməsi planlaşdırılan ümumi seçkilər üçün 23 yanvarda buraxılacağını bildirmişdi.
Hakim Liberal Demokrat Partiyasında (LDP) baş verən liderlik dəyişikliyindən sonra vəzifəyə gələn Takaiçi erkən seçkini baş nazirliyi üçün xalqdan etimad səsi almaq baxımından zəruri hesab etdiyini qeyd edib.
Yaponiyanın ilk qadın Baş naziri kimi 2025-ci ilin oktyabrında vəzifəyə başlayan Takaiçi bu erkən seçki qərarı ilə “baş nazirlik vəzifəsini riskə atdığını və bu postda qalmaq-qalmamaq məsələsində seçicilərin qərarını gözlədiyini” ifadə edib.
