Lent az portalından verilən məlumata görə, ain.az xəbər yayır.
Siklon zamanı Aralıq dənizini keçməyə cəhd edən yüzlərlə qeyri-qanuni miqrant həlak olub. Təkcə bir hadisə nəticəsində 50 nəfər ölüb, lakin İtaliya hakimiyyətinin qiymətləndirməsinə görə, ötən həftə ümumilikdə 380 nəfər dənizdə boğulub.
Lent.az “The Guardian”na istinadla bildirir ki, İtaliya sahil mühafizəsinin məlumatına görə, ötən həftə “Harri” siklonu Cənubi İtaliya və Maltaya təsir göstərdiyi vaxt Aralıq dənizini keçməyə çalışan təxminən 380 nəfər boğularaq həlak olub. Malta hakimiyyəti gəmi qəzası nəticəsində 50 nəfərin öldüyünü təsdiqləyib.
Cümə günü baş verən gəmi qəzasından sonra Maltada xəstəxanaya yerləşdirilən yalnız bir nəfər sağ qalıb. Bildirilir ki, həmin kişi xilas edilənə qədər 24 saat ərzində dənizdə qalıb və gəminin qalıqlarından yapışaraq sağ qalmağa çalışıb. Onu bir ticarət gəmisi xilas edib. O, 20 yanvarda Tunisdən yola çıxan gəmidəki digər bütün sərnişinlərin həlak olduğunu düşündüyünü bildirib. Bu barədə dənizdə təhlükə altında olan insanlar üçün qaynar xəttə malik olan Alarm Fon təşkilatı məlumat verib.
İtaliyanın UNICEF-in miqrantlar və qaçqınlar üzrə bölməsinin məlumatına görə, ötən həftə daha bir faciə baş verib: Qvineyadan olan bir yaşlı əkiz qızların, ehtimal ki, Siciliyanın Lampedusa adası sahillərində həlak olduqları bildirilir. Onların olduğu həddindən artıq dolu qayıq “Harri” siklonu nəticəsində dağılıb.
İtaliya sahil mühafizəsinin qiymətləndirməsinə görə, Aralıq dənizində böyük dalğalara səbəb olan siklon zamanı Tunisdən yola çıxan daha 380 nəfər də boğulmuş ola bilər. Son 10 gün ərzində sahil mühafizəsi əlverişsiz hava şəraitinə baxmayaraq, Tunisin Sfaks liman şəhərindən qaçaqmalçılar tərəfindən yola salınmış 8 gəmini aşkar edib.
İtaliya Daxili İşlər Nazirliyinin məlumatına əsasən, 2025-ci ildə 66 296 nəfər qayıqlarla İtaliya sahillərinə çatıb. Bu, ötən illə müqayisədə bir qədər, 2023-cü illə müqayisədə təxminən iki dəfə azdır. 2023-cü ildə İtaliyanın ultra-sağ hökuməti Afrikadan gələn qaçqın axınını dayandırmaq üçün Liviya və Tunis ilə razılaşmaları sərtləşdirmişdi.
İtaliya hökumətinin sərt tədbirləri, o cümlədən cərimələr və xilas edilən insanların yaxın limanlara (məsələn, Siciliyaya) deyil, uzaq limanlara çıxarılması tələbləri səbəbindən Aralıq dənizində QHT-lərə məxsus xilasetmə gəmilərinin sayı azalıb.
“The Guardian” qeyd edir ki, sərt tədbirlərə baxmayaraq, insanlar hələ də Avropada sığınacaq tapmaq ümidi ilə Şimali Afrikadan riskli səfərlərə çıxırlar. İtaliya qeyri-qanuni miqrantların əsas eniş nöqtələrindən biridir və Mərkəzi Aralıq dənizi marşrutu dünyanın ən təhlükəli marşrutlarından biri hesab olunur.
BMT-nin Beynəlxalq Miqrasiya Təşkilatının məlumatına görə, 2014-cü ildən bəri sərhədi keçməyə çalışan insanlar arasında azı 25 600 ölüm və itkin düşmə faktı qeydə alınıb. “The Guardian”ın bildirdiyinə görə, bu ölümlərin və ya itkin düşmələrin əksəriyyəti ya Tunisdən, ya da Liviyadan yola çıxan sərnişinlərdir.
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
