Tehran Vaşinqton və İsraillə yeni hərbi qarşıdurma riskini nəzərə alaraq bölgələrə geniş səlahiyyətlər verir...
Poliqon xəbər verir ki, The Financial Times nəşrinin məlumatına görə, İran hakimiyyəti ABŞ və İsraillə mümkün yeni hərbi toqquşma təhlükəsi fonunda fövqəladə tədbirlərin tətbiqinə başlayıb. Rəsmi Tehran artan təhlükəsizlik risklərini nəzərə alaraq dövlət idarəçiliyinin fasiləsizliyini təmin etməyə çalışır.
Məlumata əsasən, İran prezidenti Məsud Pezeşkian regional hakimiyyət orqanlarına genişləndirilmiş səlahiyyətlərin verilməsi barədə göstəriş verib. Bu qərarın məqsədi mümkün hərbi zərbə və ya ölkənin ali rəhbərliyinin həlak olması halında dövlət mexanizminin iflic olmasının qarşısını almaqdır.
Yeni qaydalara görə, vilayət qubernatorları fövqəladə şəraitdə müstəqil qərarlar qəbul etmək hüququ qazanır. Onlara məhkəmə orqanları və digər dövlət strukturları ilə birbaşa əlaqə qurmaq, bürokratik prosedurları minimuma endirmək və idarəetməni sürətləndirmək səlahiyyəti verilir. Bundan əlavə, regional rəhbərliklərə ərzaq, dərman və digər zəruri istehlak mallarının idxalını operativ şəkildə həyata keçirmək imkanı yaradılır.
The Financial Times qeyd edir ki, bu addımlar İran rəhbərliyinin mümkün genişmiqyaslı hərbi eskalasiyaya ciddi hazırlaşdığını göstərir. Analitiklərin fikrincə, Tehran ABŞ-nin İranın hərbi və ya nüvə obyektlərinə zərbə endirə biləcəyi ssenarini istisna etmir və eyni zamanda İsraildən gələ biləcək hücum risklərini də nəzərə alır.
Müşahidəçilər bildirirlər ki, regional idarəetmənin gücləndirilməsi İranın böhran şəraitində mərkəzsiz, lakin daha çevik reaksiya vermək strategiyasının tərkib hissəsidir. Bu isə ölkə daxilində təhlükəsizlik, sosial sabitlik və iqtisadi təminatın qorunmasına yönəlmiş preventiv addım kimi qiymətləndirilir.
Poliqon.info
