ain.az, Azpolitika.az portalına istinadən məlumat verir.
Ukrayna Prezidenti Volodimir Zelenski ABŞ və Rusiya ilə növbəti üçtərəfli danışıqların yenidən İsveçrədə baş tutacağını açıqlayıb.
“AzPolitika” bildirir ki, o, bu barədə britaniyalı jurnalist Piers Morgana müsahibəsində bildirib.
“Bu günə olan məlumata görə, növbəti görüş də İsveçrədə olacaq. Əlbəttə, nümayəndə heyətimiz geri qayıdacaq və onda telefondakı məlumatdan daha detallı informasiya verə biləcəyəm”, – deyə Zelenski vurğulayıb.
Zelenski İsveçrədə danışıqların keçirilməsini “yaxşı məqam” adlandırıb. Onun sözlərinə görə, Yaxın Şərq və digər ölkələrə hörmətlə yanaşsa da, müharibə Avropada getdiyi üçün sülh danışıqları da Avropada aparılmalıdır.
Ukrayna lideri növbəti raundun dəqiq tarixini açıqlamayıb. Lakin o, çərşənbə axşamı axşam müraciətində görüşün fevralın sonunadək baş tuta biləcəyini istisna etməyib.
Rusiya nümayəndə heyətinin rəhbəri, Rusiya prezidentinin köməkçisi Vladimir Medinsky isə yeni görüşün yaxın vaxtlarda keçiriləcəyini bildirib.
Fevralın 18-də Geneva şəhərində ABŞ, Ukrayna və Rusiya nümayəndələri arasında üçtərəfli danışıqlar baş tutub.
Zelenski görüşün yekunlarına dair bildirib ki, Ukrayna nəticədə maraqlıdır, lakin indiki mərhələdə əldə olunan nəticəni yetərli saymaq mümkün deyil.
Onun sözlərinə görə, hərbi məsələlər üzrə müzakirələr ciddi və məzmunlu olub. Lakin həssas siyasi məsələlər, mümkün kompromislər və liderlərin görüşü ilə bağlı mövzular kifayət qədər işlənməyib.
Medinski isə danışıqları “çətin, lakin işgüzar” kimi xarakterizə edib.
“RBK-Ukrayna”nın məlumatına görə, Moskvanın əsas tələbi dəyişməz qalır – Ukrayna qoşunlarının Donbas ərazisindən çıxarılması. Mənbə bildirib ki, Medinskinin danışıqlar zamanı “tarixi dərslər”ə toxunması da diqqət çəkib.
Zelenski isə cümə axşamı “Telegram” kanalında yazıb ki, müharibəni bitirmək və diplomatiyaya keçmək üçün “tarixi söhbətlərə” ehtiyac yoxdur və bunu prosesi uzatma taktikası kimi qiymətləndirib.
“Putin qədər az tarixi kitab oxumamışam. Onun ölkəsi haqqında o, Ukrayna barədə bildiyindən daha çox şey bilirəm. Sadəcə ona görə ki, Rusiyanın bir çox şəhərlərində olmuşam və orada çox insan tanımışam”, – deyə Ukrayna prezidenti vurğulayıb.
“AzPolitika.info”
Daha ətraflı məlumat və yeniliklər üçün ain.az saytını izləyin.
