Macarıstan hökuməti Kiyevdən gələn təzyiq və təhdidlərə baxmayaraq, Rusiyadan enerji idxalı və Ukraynanın Avropa İttifaqına üzvlüyü məsələsində mövqeyini dəyişməyəcəyini bəyan edib.
Editor.az xəbər verir ki, rəsmi Budapeşt Ukraynanın tələbləri və təhdidləri fonunda Rusiyadan enerji tədarükü, eləcə də Ukraynanın Avropa İttifaqı-na (Aİ) üzvlüyü ilə bağlı siyasətində hər hansı dəyişiklik etməyəcəyini açıqlayıb.
Ukrayna Macarıstandan Rusiya enerji mənbələrindən imtina etməyi, Kiyevə maliyyə dəstəyi göstərməyi və ölkənin Aİ-yə üzvlüyünü dəstəkləməyi tələb edir. Lakin hökumət bildirib ki, heç bir təzyiq və təhdid qarşısında proqramından geri çəkilməyəcək və konstitusion andına sadiq qalacaq. Rəsmi Budapeşt yalnız Macar xalqının maraqları əsasında qərar qəbul etdiyini və hər hansı xarici gücün tələblərinə boyun əyməyəcəyini vurğulayıb.
Macarıstanın Baş naziri Viktor Orban daha əvvəl ölkəsinin Ukraynaya münasibətdə iki qarşı addım atdığını açıqlamışdı. Bunlara Ukraynaya dizel yanacağının tədarükünün dayandırılması və Kiyevə ayrılması nəzərdə tutulan 90 milyard avro həcmində Aİ kreditinin bloklanması daxildir.
Macarıstanın xarici işlər naziri Peter Szijjarto isə bildirib ki, dizel tədarükünün dayandırılması qərarı Ukraynanın Rusiya neftinin “Drujba” boru kəməri vasitəsilə Macarıstana tranzitinin siyasi səbəblərlə bərpasından imtina etməsinə cavab olaraq qəbul edilib. Onun sözlərinə görə, Kiyev bu addımla ölkədə enerji böhranı yaratmağı və aprel ayında keçiriləcək seçkilərə təsir göstərməyi hədəfləyib.
//Gülnarə Abasova, Editor.az
