İsrail Futbol Assosiasiyasının mətbuat xidməti ölkə komandalarının beynəlxalq turnirlərdən mümkün kənarlaşdırılması ilə bağlı yayılan xəbərlərə münasibət bildirib.
ABŞ və İsrailin fevralın sonunda İrana qarşı hərbi əməliyyata başlamasından sonra bölgədə gərginlik artıb. İran isə cavab olaraq ABŞ-ın İsrail, Qətər, BƏƏ, Səudiyyə Ərəbistanı, Küveyt və Bəhreyndə yerləşən hərbi bazalarına zərbələr endirib.
QOL.az xəbər verir ki, mövcud vəziyyət fonunda İsrail millisinin və klub komandalarının beynəlxalq yarışlardan uzaqlaşdırılması ilə bağlı FİFA və UEFA-dan hər hansı müraciətin olub-olmaması barədə suala Assosiasiyanın nümayəndəsi belə cavab verib:
“Xeyr. Hər şey yaxşı olacaq. Bununla bağlı narahat deyilik”, – deyə qurumun adının açıqlanmasını istəməyən təmsilçisi bildirib.
Qeyd edək ki, hazırda İsrail yığması və klub komandaları beynəlxalq turnirlərdə iştirakını davam etdirir.
