Şəki Apellyasiya Məhkəməsində səhlənkarlıqda təqsirləndirilən Fatimə Abdullazadənin barəsindəki hökmdən dövlət ittihamçısı tərəfindən verilən apellyasiya protesti və apellyasiya şikayəti üzrə məhkəmə prosesi başa çatıb.
Pravda.az-ın əldə etdiyi məlumata görə, hakim Akif Eyvazovun sədrliyi ilə keçirilən iclasda qərar elan olunub.
Qərara əsasən, dövlət ittihamçısının apellyasiya protesti və zərərçəkmiş şəxsin hüquqi varisinin nümayəndəsinin apellyasiya şikayəti təmin edilməyib. Təqsirləndirilən şəxsin müdafiəçisinin apellyasiya şikayəti təmin olunub, Göyçay Rayon Məhkəməsinin hökmü ləğv edilib. Fatimə Abdullazadə Cinayət Məcəlləsinin 314.2-ci maddəsində nəzərdə tutulan cinayət əməlini törətməkdə təqsirliliyi sübuta yetirilmədiyinə görə ona bəraət verilib. Mülki iddianın baxılmamış saxlanılması qərara alınıb.
İttihama görə, hadisə 22 iyul 2022-ci il tarixdə, saat 04 radələrində Göyçay Rayon Mərkəzi Xəstəxanasında qeydə alınıb.
Belə ki, rayon sakini, 1993-cü il təvəllüdlü Həsənova M. Teymur (ad şərti) qızı yüksək hərarətlə sözügedən xəstəxanaya çatdırılıb. Tibbi müdaxiləyə baxmayaraq M.Həsənova orada vəfat edib. Həmin müddətdə Fatimə Abdullazadə xəstəxananın təcili və təxirəsalınmaz tibbi yardım şöbəsinin təcili yardım bölməsində məsul növbətçi həkim xidmətində olub. Hadisədən sonra o, cinayət məsuliyyətinə cəlb edilib.
Göyçay Rayon Məhkəməsinin hökmü ilə o, 3 il 6 ay müddətinə azadlığın məhdudlaşdırılması (elektron qolbaq) cəzasına məhkum edilib. Hökmdən narazı qalan dövlət ittihamçısı apellyasiya protesti və zərərçəkmiş şəxsin hüquqi varisinin nümayəndəsi isə apellyasiya şikayəti verib. Şəki Apellyasiya Məhkəməsi şikayət və protesti qismən təmin edib, hökmü cəzaya aid hissədə dəyişdirib. Belə ki, təqsirləndirilən şəxs 1 il 6 ay müddətinə həkimlik fəaliyyəti ilə məşğul olmaq hüququndan məhrum edilməklə 2 il həbs cəzasına məhkum olunub. Hökmdə qeyd edilib ki, Fatimə Abdullazadə cəzasını məntəqə tipli cəzaçəkmə müəssisəsində çəkəcək. Ali Məhkəmənin qərarına əsasən, qərar tamamilə ləğv edilib, iş yenidən baxılması üçün apellyasiya instansiyası məhkəməsinə göndərilib.
Kamal Məmmədov
