ABŞ Ədliyyə Nazirliyinin sənədinə görə, haker uşaqların istismarı ilə bağlı araşdırmalar üçün istifadə olunan serverdəki boşluqdan istifadə edərək bəzi materiallara baxa bilib...
Poliqon xəbər verir ki, Reuters Agentliyi ABŞ Ədliyyə Nazirliyinin sənədinə və məlumatlı mənbələrə istinadən bildirib ki, 2023-cü ildə xarici haker ABŞ Federal Təhqiqat Bürosunun (FTB) maliyyəçi Ceffri Epşteyn işi ilə bağlı araşdırma materiallarının yerləşdiyi serverə daxil ola bilib.
Məlumata görə, hadisə FTB-nin Nyu-Yorkdakı ofisində baş verib. Sındırılma faktı 2024-cü ilin fevral ayında məlum olsa da, həmin vaxt insidentin detalları açıqlanmamışdı. Sonradan aparılan daxili araşdırma zamanı məlum olub ki, serverdə texniki boşluq mövcud olub və bu boşluqdan istifadə edən haker bəzi faylları nəzərdən keçirə bilib.
Reuters-in əldə etdiyi məlumatlara görə, FTB-nin xüsusi agenti Aaron Spivak rəqəmsal sübutların işlənməsi prosedurunu araşdırarkən uşaqların istismarı ilə bağlı cinayətlərin məhkəmə-tibbi ekspertizasına aid serverdəki zəifliyi nəzərdən qaçırıb. Bu texniki boşluq isə sistemə kənardan daxil olmağa imkan verib.
Daxili araşdırma sənədlərinə əsasən, naməlum xarici haker Ceffri Epşteyn işi ilə bağlı müəyyən fayllara baxa bilib. Lakin həmin faylların sonradan ABŞ Ədliyyə Nazirliyi tərəfindən açıqlanan sənədlər olub-olmaması və ya hələ də məxfi qalan materiallara aid olub-olmaması məlum deyil.
Reuters-in mənbələrindən biri bildirib ki, haker, ehtimal ki, daxil olduğu sistemin hüquq-mühafizə orqanlarına məxsus olduğunu əvvəlcə anlamayıb. Mənbənin sözlərinə görə, naməlum şəxs serverdə uşaqların pornoqrafik materiallarına aid görüntülərin mövcudluğunu gördükdə bundan ciddi narahatlıq keçirib və cihazın sahibini FTB-yə şikayət edəcəyi ilə bağlı hədələyib.
Agentliyin məlumatına görə, vəziyyəti aydınlaşdırmaq üçün FTB əməkdaşları həmin şəxslə videozəng əlaqəsi yaradıb. Onlar öz xidməti vəsiqələrini göstərərək qarşı tərəfə sistemin hüquq-mühafizə qurumuna məxsus olduğunu və araşdırmanın rəsmi istintaq çərçivəsində aparıldığını izah etməyə çalışıblar.
Ekspertlər qeyd edirlər ki, bu hadisə ABŞ-da hüquq-mühafizə orqanlarının istifadə etdiyi rəqəmsal infrastrukturların təhlükəsizliyi ilə bağlı sualları yenidən gündəmə gətirib. Eyni zamanda, insident Epşteyn işi ilə bağlı araşdırmaların həssaslığı və bu mövzuda saxlanılan məlumatların yüksək məxfilik səviyyəsi səbəbindən geniş diqqət çəkib.
Poliqon.info
