Şirvan-Salyan Regional Təhsil İdarəsi 2025–2026-cı tədris ili üzrə Respublika Fənn Olimpiadasının (RFO) final mərhələsinə vəsiqə qazanan şagirdlərin sayını və fənlər üzrə bölgüsünü açıqlayıb.
Şirvan-Salyan Regional Təhsil İdarəsindən AzEdu.az-a bildirilib ki, ümumilikdə region üzrə 59 şagird final turunda iştirak hüququ qazanıb.
Onların 17-si Azərbaycan dili, 10-u riyaziyyat, 10-u coğrafiya, 8-i kimya, 7-si biologiya, 4-ü tarix, 2-si fizika, 1-i isə informatika fənni üzrə final mərhələsində mübarizə aparacaq.
Qeyd edək ki, Respublika Fənn Olimpiadaları şagirdlərin elmi biliklərinin artırılması, istedadlı şagirdlərin üzə çıxarılması və onların inkişafının dəstəklənməsi baxımından mühüm əhəmiyyət daşıyır.
