ain.az, Ayna portalından verilən məlumatlara əsaslanaraq xəbər verir.
İrana qarşı müharibə Fars körfəzindən enerji təchizatını dayandırıb
Avropa İttifaqı (Aİ) ABŞ və İsrailin İrana qarşı müharibəsi səbəbindən Rusiya neft və qaz idxalına qoyulan qadağanı ləğv edə bilər. Çünki bu müharibə Fars körfəzindən enerji təchizatını dayandırıb. AYNA.AZ xəbər verir ki, “Bloomberg” bu barədə məlumatlı mənbələrə istinadən məlumat yayıb.
Agentlik yazıb ki, xüsusilə Aİ Rusiya qazından imtina etmək istəyib və Yaxın Şərqdən təchizatı artırmaqla itirilmiş həcmləri kompensasiya edə biləcəyinə inanıb. Lakin bu planlar hazırda təhlükə altındadır.
Əsas səbəb İranın qlobal neft təchizatının təxminən 20%-nin və mayeləşdirilmiş təbii qazın (LNG) 30%-ə qədərinin keçdiyi həyati enerji arteriyası olan Hörmüz boğazını blok etməsidir.
“Bloomberg” mənbələrinə görə, İran rəsmiləri hazırda boğazın yenidən açılmasını müzakirə etmək belə istəmirlər. Yüksək vəzifəli bir Avropa rəsmisi qeyd edib ki, Yaxın Şərqdəki müharibə bitsə belə, gəmi sahiblərinin bir müddət boğazdan keçməkdən imtina etməsi riski var.
Vəziyyət İranın Fars körfəzi ölkələrindəki enerji infrastrukturuna zərbələri ilə daha da ağırlaşır. Xüsusilə, İran ordusu dünyanın ən böyük LNG istehsal kompleksinin yerləşdiyi Qətərin Ras Laffan sənaye şəhərinə raket zərbəsi endirib. “QatarEnergy” şirkətinin baş direktoru Saad əl-Kaabi bildirib ki, işləməyən gücün bərpası (ildə 12,8 milyon ton LNG) üç ildən beş ilə qədər vaxt aparacaq.
Nəticələr artıq bazarda hiss olunur: Avropada qazın qiyməti 19 martda 32% artaraq MVt/saat üçün 72 avroya (min kubmetr üçün 873,5 dollar) çatıb. “Bloomberg” yazıb ki, böhran qlobal enerji təchizatı ilə bağlı narahatlıqları daha da artırır və Ras Laffana edilən zərbələr Qətəri bir neçə il etibarlı təchizatçılar siyahısından çıxarır. Avropa Mərkəzi Bankı xəbərdarlıq edir ki, uzunmüddətli fasilə Avrozonada inflyasiyanı 6,3%-ə çatdıra və qısamüddətli tənəzzülə səbəb ola bilər.
“Bloomberg” hesab edir ki, mövcud vəziyyət artıq Ukraynadakı müharibənin maliyyələşdirilməsinə kömək edən qlobal neft qiymətlərinin artmasından faydalanan Vladimir Putin üçün "böyük bir hədiyyə"yə çevrilir. Agentlik yazır ki, Aİ rəsmiləri ABŞ və İsrailin böhrandan çıxmaq planına inamlarını itirir və gələcəkdə daha dərin iqtisadi qarışıqlıqdan qorxurlar.
Sonrakı hadisələr barədə daha çox məlumat almaq üçün ain.az saytını izləyin.
