Ankara, 3 aprel, AZƏRTAC
“Akkuyu” AES layihəsinin təcrübəsi dinc nüvə enerjisi haqqında biliklərimizi əhəmiyyətli dərəcədə zənginləşdirib.
AZƏRTAC xəbər verir ki, Türkiyənin “IC Holding” şirkətinin icraçı direktoru Can Çaka bu barədə İstanbul Texniki Universiteti (ITU) ilə “Yerli nüvə reaktorunun inkişafı” layihəsi çərçivəsində əməkdaşlıq müqaviləsinin imzalanma mərasimində bildirib.
O, yerli nüvə reaktorlarının inkişafının Türkiyənin enerji təhlükəsizliyinə, karbon neytrallığına və texnoloji müstəqilliyinə töhfə verəcəyini bildirib.
“Biz Türkiyədə hərtərəfli nüvə texnologiyası sistemi yaradırıq və ölkənin gələcəyinə töhfə veririk”, -deyə Çaka qeyd edib.
Türkiyənin enerji və təbii sərvətlər naziri Alparslan Bayraktar da bundan əvvəl Türkiyənin elektrik enerjisinə olan ehtiyacının 10 faizini ödəyəcək ölkənin ilk nüvə elektrik stansiyasının əhəmiyyətini bildirmişdi. Departament rəhbəri cənubdakı Mersin əyalətindəki “Akkuyu” AES-də elektrik enerjisi istehsalının bu il planlaşdırıldığını açıqlayıb.
Nazir xatırladıb ki, “Akkuyu” layihəsi ilə bağlı ilk Rusiya-Türkiyə müqaviləsi 2010-cu ildə imzalanıb. İlk reaktor oktyabrın 29-da - Cümhuriyyət Günündə istifadəyə verilə bilər.
