BAKI, TurkicWorld, Orxan Qədirzadə
ABŞ-ın Texas ştatının El-Paso şəhərində yerləşən ən böyük miqrant saxlama mərkəzində aparılan yoxlamalar nəticəsində saxlama standartlarının 49 dəfə pozulduğu müəyyən edilib.
TurkicWorld xəbər verir ki, bu barədə ABŞ Konqresinin tapşırığı ilə Miqrasiya və Gömrük Mühafizəsi İdarəsinin (ICE) nəzarət şöbəsi tərəfindən hazırlanan hesabatda qeyd olunub.
"Camp East Montana" adlanan və inşasına 1,2 milyard dollar xərclənən bu müəssisədəki pozuntuların 22-si güc tətbiqi və məhdudlaşdırıcı vasitələrdən istifadə, 11-i müəssisənin təhlükəsizliyi, 5-i isə tibbi yardımla bağlıdır. Hesabatda "qayda pozuntusu" ifadəsi saxlama standartlarının, siyasətin və ya əməliyyat prosedurlarının hər hansı formada pozulması kimi xarakterizə edilir.
Prezident Donald Trampın rəhbərliyi altında həyata keçirilən sərt miqrasiya siyasəti insan haqları müdafiəçilərinin kəskin etirazına səbəb olur. Rəsmi məlumatlara görə, 2026-cı ilin yanvarından mart ayına qədər miqrasiya təcridxanalarında 14 nəfər dünyasını dəyişib. Ötən il isə bu rəqəm 31 nəfər təşkil edib ki, bu da son iyirmi ilin ən yüksək göstəricisidir. Meksika Prezidenti Klaudiya Şeynbaum ABŞ-dakı mərkəzlərdə vətəndaşlarının ölümünə etiraz edəcəyini bildirib.
