Son günlər böyüklər və uşaqlar arasında su çiçəyi xəstəliyi geniş yayılıb. Bəzi insanlarda xəstəlik yüngül keçsə də, lakin bəzilərində daha ağır formada davam edir.
Bəs su çiçəyi ilə bağlı hazırkı vəziyyət nə yerdədir?
Bizim.Media xəbər verir ki, mövzu ilə bağlı “pravda.az”a açıqlama verən pediatr Leyla Şükürovanın sözlərinə görə, su çiçəyi (varicella) dövri şəkildə artıb-azalan bir xəstəlikdir.
O bildirib ki, son illərdə xəstəliyin artımının müəyyən səbəbləri var:
“Səbəblərdən biri peyvəndlənmə səviyyəsinin fərqli olmasıdır. Bəzi regionlarda varicella vaksini geniş tətbiq olunmur. Xüsusilə payız-qış və yazda daha çox yayılır. Əvvəlki dövrlə müqayisədə bəzi yerlərdə yoluxma hələ də yüksəkdir, amma ağırlaşmalar əvvəlki qədər tez-tez deyil. Erkən diaqnoz və daha yaxşı gigiyena səbəbilə ikincili bakterial infeksiyaların qoşulması nisbətən azalıb. Amma yenə də 1 yaşdan kiçiklər, böyüklər, immuniteti zəif olanlar üçün risk qalır”.
Pediatr, bir il öncə bu növ xəstəliklərin daha aqressiv formasının yayılma səbəblərindən bəhs edib:
“Buna səbəb qızılca və su çiçəyinin eyni vaxtda yayılması idi. İmmunitet zəifliyi, sıx yoluxma səbəbindən xəstəlik daha ağır keçirdi. Dəri səpkilərinə tez-tez bakteriya qoşulurdu, irinləmə, çapıqlaşma, uzun sağalma vəziyyətləri müşahidə edilirdi.
Su çiçəyinin ilkin əlamətləri yüngül hərarətlə (37,5-38,5) başlayır. Halsızlıq ola bilər. Daha sora qırmızı, kiçik qabarıq, içində maye olan suluq (vezikula) səpkilər yaranır. Səpkilər ilk olaraq sinədə, bel, sonra saç dibi nahiyələri, üz ətraflarında yaranaraq artır. 5-7 gün ərzində səpkilər arta bilər.
Əgər hərarət 39-dan yuxarı və uzun müddətli davam edərsə, səpkilərin içində irin olarsa, bakterial infeksiya qoşularsa təhlükəli hesab edilə bilər. Böyüklərdə daha ağır gedişli keçə bilər. Qaşınmalar üçün antihistamin dərman preparatlarından istifadə gərəklidir. İzlərin qalmaması üçün səpkilərin qaşınmaması vacibdir. Bu müddətdə istirahət, bol maye qəbulu gərəklidir”.
Bizim.Media
