Brüssel, 8 aprel, AZƏRTAC
İranla müharibə fonunda Avropanın ev təsərrüfatları enerji xərclərinin kəskin artımı ilə üzləşə bilər.
AZƏRTAC xəbər verir ki, bu barədə “Euractiv” portalının Avropa Həmkarlar İttifaqları Konfederasiyasının (ETUC) araşdırmasına əsaslanan məqaləsində deyilir.
Məqaləyə görə, ev təsərrüfatlarının orta enerji xərcləri 2026-cı ildə təxminən 50 faiz arta bilər. Bu, ailələrin maliyyə yükünü əhəmiyyətli dərəcədə artıracaq və Avropada yaşayış xərcləri böhranını daha da ağırlaşdıracaq.
Qeyd olunur ki, əsas amil münaqişə və enerji təchizatındakı fasilələr səbəbindən qlobal neft və qaz qiymətlərinin kəskin artmasıdır. Xüsusilə, qlobal təchizatın əhəmiyyətli bir hissəsinin keçdiyi Hörmüz boğazı ətrafındakı vəziyyət bazarda qeyri-sabitliyi gücləndirir.
Məqalədə vurğulanır ki, ən böyük təsir enerji xərclərinin büdcələrinin əhəmiyyətli bir hissəsini təşkil edən əhalinin həssas qrupları tərəfindən hiss olunacaq. Həmkarlar ittifaqları enerji yoxsulluğunun artması riski barədə xəbərdarlıq edir, həmçinin Aİ hakimiyyət orqanlarını qiymət nəzarəti və ev təsərrüfatlarına əlavə yardım da daxil olmaqla dəstək tədbirləri həyata keçirməyə çağırır. Eyni zamanda, “Euractiv” portalının icmalına görə, enerji böhranı Aİ iqtisadiyyatı üçün uzunmüddətli nəticələrə səbəb ola, inflyasiya təzyiqini artıra və vətəndaşların alıcılıq qabiliyyətini azalda bilər.
Portalın məqaləsində qeyd edilir ki, hökumətlər təcili tədbirlər görməzsə, enerji qiymətlərinin artmasının yaxın gələcəkdə Avropanın üzləşdiyi əsas sosial-iqtisadi çətinliklərdən birinə çevrilə biləcəyi istisna olunmur.
