Kamçatkada 2 turist donaraq ölüb.
İnterpress.az xəbər verir ki, bu barədə rus mətbuatı məlumat yayıb.
Kamçatkanın Nalıçevski parkında turist qrupu ilə bağlı faciəli hadisə baş verib. Sankt-Peterburq və Çerepovetsdən olan 9 nəfərlik qrup martın 28-də yürüşə çıxıb.
Aprelin 3-də qrup daxilində yaranan münaqişə səbəbindən onlar iki yerə bölünüblər; iki nəfər qısa marşrutla, yeddi nəfər isə ləvazimat olmadan yollarına davam ediblər.
Hava şəraitinin pisləşməsi, güclü çovğun və şaxta (−9 °C) nəticəsində çadırsız qalan turistlərin vəziyyəti kritikləşib.
Xilasedicilər 7 saat davam edən axtarış-xilasetmə əməliyyatı nəticəsində qrupun iki üzvünün — Sankt-Peterburq Dağ Universitetinin tələbələri, 24 yaşlı Sergey və 22 yaşlı Fyodorun donmuş cəsədlərini tapıblar.
Qrupun digər 7 üzvü tapılıb, onlardan 5-i ağır donvurma xəsarətləri ilə vertolyotla təxliyə edilib.
Faktla bağlı ehtiyatsızlıqdan ölümə səbəb olma və təhlükəsizlik tələblərinə cavab verməyən xidmətlərin göstərilməsi maddələri ilə cinayət işi başlanılıb.
Xuraman Etibarlı
İnterpress.az
