Nəticələrə əsasən qeyd edək ki, bank əsas göstəricilər üzrə artım dinamikasını qoruyub saxlayıb. 2026-cı ilin ilk üç ayı ərzində “Rabitəbank”ın faiz gəlirləri ötən ilin analoji dövrü ilə müqayisədə 23 faiz artaraq 38 milyon 292 min manata, qeyri-faiz gəlirləri isə 16,8 faiz artaraq 11 milyon 101 min manatı ötüb.
Rüb ərzində bank 5,1 milyon manat xalis mənfəət əldə edib. Bu, ötən ilin müvafiq dövrü ilə müqayisədə 9,4 faiz artım deməkdir. Bankın aktivləri isə əvvəlki ilin eyni dövrü ilə müqayisədə 16,4 faiz artaraq 1 milyard 395 milyon 269 min manata çatıb.
Kredit portfelində artım dinamikası
Hesabat dövründə bankın strateji hədəflərinə uyğun olaraq, biznes kreditlərinin həcmi əhəmiyyətli dərəcədə artaraq, ümumi kredit portfelində payını yüksəltməkdə davam edib. Bankın kredit portfeli böyüyərək ötən ilin müvafiq dövrü ilə müqayisədə 8 faiz artıb. Nəticədə ümumi kredit portfeli 944 milyon 275 min manata yüksəlib.
Kredit portfelinin əsas hissəsini biznes kreditləri təşkil edir. Belə ki, ötən ilin cari dövrü ilə müqayisədə biznes kreditləri portfeli 3,6 faiz artaraq 417 milyon 583 min manata, o cümlədən, istehlak kreditləri portfeli 12 faiz artaraq, 340 milyon 545 min manata, ipoteka kreditləri isə 11,7 faiz artaraq 186 milyon 147 min manata çatıb.
Əmanət portfelində müsbət nəticələr
Bankın əmanət portfeli üzrə göstəricilər müsbət dinamikanı qoruyub saxlayır. Belə ki, ümumi əmanət portfeli ötən ilin analoji dövrü ilə müqayisədə 21,2 faiz artaraq 836 milyon 293 min manata yüksəlib. Xüsusilə fiziki şəxslər üzrə əmanətlərdə nəzərəçarpacaq artım müşahidə olunub. Bu seqment üzrə əmanətlər 32,7 faiz artaraq 622 milyon 846 min manata çatıb ki, bu da müştərilərin banka olan etimadının daha da gücləndiyini göstərir.
Hazırda “Rabitəbank” ASC 19 region və Bakı şəhəri üzrə ümumilikdə 31 xidmət məntəqəsi, 78 ATM-i, “Rabita Mobile” tətbiqi, İnternet Bankçılıq platforması, “Rabita Business” tətbiqi, “RabitaBot” çatbotu və 133 nömrəli Çağrı Mərkəzi ilə öz müştərilərinə ən müasir standartlar səviyyəsində geniş spektrli bank xidmətləri təqdim edir.
