Livan Prezident Administrasiyası bəyan edib ki, ölkədə atəşkəsin əldə olunması İsraillə onilliklərdir dayandırılmış birbaşa danışıqların bərpası üçün əsas şərt və çıxış nöqtəsidir.
AFN.az xarici mediaya istinadən xəbər verir ki, bu bəyanat aprelin 14-də Vaşinqtonda ABŞ-ın vasitəçiliyi ilə Livan və İsrail səfirləri arasında keçirilən və rəsmi şəxslər tərəfindən "məhsuldar" adlandırılan ilk təmasların davamı kimi səslənib.
Livan Prezidenti Cozef Aun daha əvvəl İsrailə birbaşa danışıqlar təklif etsə də, İsrail tərəfi "Hizbullah"ın tərksilah edilməsi məsələsini ön plana çəkərək atəşkəsi rədd edirdi. Lakin son məlumatlara görə, regionda gərginliyin azaldılması istiqamətində ciddi irəliləyiş qeydə alınıb.
ABŞ Prezidenti Donald Trampın vasitəçiliyi ilə yaxın saatlarda İsrail Baş naziri Benyamin Netanyahu və Livan Prezidenti Cozef Aun arasında son 34 ildə ilk dəfə birbaşa görüşün keçirilə biləcəyi gözlənilir.
Qeyd edək ki, Livan hökuməti mart ayından bəri davam edən hərbi əməliyyatların dayandırılması və ölkənin ərazi bütövlüyünün qorunması üçün beynəlxalq ictimaiyyətə müraciətlərini davam etdirir. Hazırda ABŞ və İran arasında əldə olunmuş kövrək atəşkəsin Livanı da əhatə edib-etməyəcəyi tərəflər arasında əsas müzakirə mövzusudur.
