Azərbaycanın xarici işlər naziri Ceyhun Bayramov İran və ABŞ arasında əldə olunan atəşkəsin davamlı sülhə çevriləcəyinə ümid etdiyini bildirib.
Redaktor.az bu barədə APA-ya istinadla xəbər verir.
Onun sözlərinə görə, regionda yaranmış son gərginlik Azərbaycanı ciddi narahat edib və rəsmi Bakı ilk gündən hərbi toqquşmaların dayandırılması üçün səylər göstərib:
“Bu son vəziyyət bizi çox ciddi narahat edirdi. İlk gündən çalışırdıq ki, hərbi toqquşmalar ən qısa zamanda dayansın və siyasi, diplomatik yollar açılsın”.
Ceyhun Bayramov qeyd edib ki, bir sıra region ölkələrinin məsuliyyətli yanaşması nəticəsində bu prosesdə irəliləyiş əldə olunub və xüsusilə Türkiyə ilə Pakistanın rolu diqqətəlayiq olub:
“Qardaş Türkiyə və Pakistan İslam Respublikasının rolunu xüsusi qeyd etmək istəyirəm. Onlar danışıqlara ev sahibliyi etməyə nail oldular və bu da atəşkəsə yol açdı. Biz çox ümidliyik ki, atəşkəs daimi sülhə çevriləcək”.
Nazir eyni zamanda İran rəsmilərinin Azərbaycana təşəkkür etməsini iki ölkə arasında həmrəylik nümunəsi kimi qiymətləndirib.
O bildirib ki, İranın xarici işlər nazirinin müavini Səid Xətibzadənin təşəkkürü Azərbaycanla İran arasında dostluq münasibətlərinin göstəricisidir.
“Hadisə baş verdiyi ilk saatlarda Azərbaycan Prezidenti dünya liderləri arasında ilk olaraq rəsmi başsağlığı mesajı göndərdi. Dövlət başçısı şəxsən İranın Bakıdakı səfirliyinə gedərək başsağlığı verdi”, – deyə nazir vurğulayıb.
Ceyhun Bayramov əlavə edib ki, Azərbaycan ilk gündən İrana humanitar yardım təklif edib və bunu tam təbii hesab edir:
“Qonşu və dost ölkədə hər hansı problem olduğu zaman bu yanaşma bizim tariximizə, ənənələrimizə və xarici siyasətimizə uyğundur”.
