Kiyev, 18 aprel, AZƏRTAC
Kiyevin Qoloseyevski rayonunda atəş açan şəxsin qeydiyyatdan keçmiş silahı olub.
AZƏRTAC-ın verdiyi məlumata görə, bu barədə daxili işlər naziri İqor Klimenko brifinqdə bildirib.
Nazirin sözlərinə görə, 1968-ci il təvəllüdlü, ehtimal ki, təqaüdçü olan kişi hadisə yerinin yaxınlığında yaşayırmış.
İ.Klimenko bildirib ki, atəş açan şəxs heç bir tələb irəli sürməyib. Onunla 40 dəqiqə danışıblar və orada kimsə yaralandığı üçün supermarketə turniket gətirməyi təklif ediblər.
"Amma o, cavab verməyib. Buna görə də, xüsusən də bir girovu vurduqdan sonra onu məhv etmək əmri verildi", - deyə Klimenko bildirib.
Eyni zamanda, nazir silahlının qeyri-sabit hərəkət etdiyini qeyd edib: "O, sadəcə insanlara dəqiq atəş açıb, onlara yaxınlaşıb və vurub. Buna görə də, onların sağ qalma şansı çox az idi".
Eyni zamanda, Klimenko hücum edənin Rusiya vətəndaşlığına malik olub-olmadığını təsdiqləməyib. "Hazırda bunu təsdiqləyə bilmərəm. İstintaq bu məlumatı təsdiqləyəcək və ya təkzib edəcək", - deyə o bildirib.
Azad edilmiş bütün girovlar səhiyyə müəssisələrinə aparılıb.
Polis, Ukrayna Milli Polisi və Təhlükəsizlik Xidmətinin müstəntiqləri, məhkəmə ekspertləri, it baxıcıları və bomba zərərsizləşdirmə mütəxəssisləri hazırda hadisə yerində işləyirlər. Prokurorluq hadisənin təsnifatını müəyyən edəcək.
Baş prokuror Ruslan Kravçenko isə hadisəni terror aktı kimi qiymətləndirib və araşdırmalara başlanıldığını açıqlayıb.
Ukrayna Prezidenti Volodimir Zelenski isə videomüraciətində bildirib ki, terrorçu əvvəllər cinayət məsuliyyətinə cəlb edilib. Zelenski bildirib ki, o, uzun müddət Donetsk vilayətində yaşayıb və Rusiyada anadan olub.
"İndi onunla bağlı hər şey, o cümlədən niyə bu qədər cinayət törətdiyi də aydınlaşdırılır. Hər bir detal yoxlanılmalıdır. Müstəntiqlərin bir neçə nəzəriyyəsi var. Onun bütün elektron cihazları, telefonu və bütün əlaqələri yoxlanılacaq”, deyə Zelenski əlavə edib.
Prezidentin sözlərinə görə, terrorçu hücumdan əvvəl yaşadığı mənzili yandırıb.
20:25
Kiyevdə baş verən atışmada beş nəfər həlak olub.
AZƏRTAC xəbər verir ki, bu barədə Ukrayna Prezidenti Volodimir Zelenski “Telegram” səhifəsində yazıb.
"Ukraynanın Daxili İşlər Naziri İqor Klimenko Kiyevdə mülki şəxslərə atəş açan hücumçunun məhv edildiyini bildirdi. Bütün hallar araşdırılır. Hazırda beş nəfərin öldüyü məlumdur. Onların ailələrinə və dostlarına başsağlığı verirəm", - deyə dövlət başçısı yazıb.
Hazırda 10 nəfər xəsarət alıb və onlar xəstəxanaya yerləşdirilib. Hamısına lazımi tibbi yardım göstərilir. Dörd girov azad edilib.
"Biz təcili araşdırma aparılacağına ümid edirik. Ukrayna Milli Polisinin və Təhlükəsizlik Xidmətinin müstəntiqləri işləyir. Mən Daxili İşlər Nazirinə və Ukrayna Milli Polisinin rəisinə bu iş üzrə bütün təsdiqlənmiş məlumatları ictimaiyyətə təqdim etməyi tapşırmışam", - deyə Zelenski bildirib.
Öz növbəsində Kiyev meri Vitali Kliçko atışmada ölənlərin sayının 6 nəfərə, yaralananların sayının isə 15-ə çatdığını bildirib.
Baş prokuror Ruslan Kravçenko isə “Telegram”da yazıb ki, paytaxtda atışma törədən Moskva sakini olub. Onun sözlərinə görə, paytaxtın Qoloseyevski rayonunda 58 yaşlı Moskva sakini atəş açıb, daha sonra supermarketdə özünü barrikadaya alıb və girov saxlayıb. İlkin məlumatlara görə, o, avtomat silahdan istifadə edib. Təcavüzkarın qeydiyyatda olduğu mənzildə eyni vaxtda yanğın baş verib.
19:46
Kiyevin mərkəzi rayonunda insanlara atəş açan şəxs polisin keçirdiyi əməliyyat nəticəsində zərərsizləşdirilib.
AZƏRTAC-ın məlumatına görə, bu barədə daxili işlər naziri İqor Klimenko “Teleqram”da bildirib.
Kiyev şəhər meri Vitali Kliçko deyib ki, tibb işçilərinin məlumatına görə, Qoloseyevski rayonunda küçə atışması nəticəsində 2 nəfər ölüb, 10 nəfər xəstəxanaya yerləşdirilib.
19:12
Aprelin 18-də naməlum şəxs Kiyevin mərkəzi rayonunda insanlara atəş açıb. Hadisə nəticəsində ölənlər və yaralananlar var.
AZƏRTAC xəbər verir ki, bu barədə Kiyev Polisi məlumat yayıb.
"Qoloseyevski rayonunda naməlum şəxs insanlara atəş açıb. Ölənlər və xəsarət alanların sayı müəyyənləşdirilir", - deyə məlumatda bildirilir.
Polis və xüsusi təyinatlılar cinayətkarı tutmaq üçün xüsusi əməliyyat keçirir. Polis hadisə ilə bağlı məlumatların yenilənəcəyini qeyd edib.
Kiyev şəhər meri Vitali Kliçko isə “Teleqram” səhifəsində bildirib ki, Qoloseyevski rayonunda yaralananlar arasında bir uşaq da var və bir neçə ölüm faktı qeydə alınıb.
"Qoloseyevski rayonunda küçədə yaralananlar arasında bir uşaq da var. Tibb işçiləri onu xəstəxanaya aparıblar", - deyə Kliçko yazıb.
Onun sözlərinə görə, hazırda atəş açan şəxsin saxlanılması üçün xüsusi əməliyyat davam edir.
