Çinin paytaxtı Pekində keçirilən yarımarafon yarışı texnologiya və idmanın diqqətçəkən sintezi ilə yadda qalıb. İnsanlarla humanoid robotların eyni istiqamətdə yarışdığı tədbirdə robotlar rekord nəticə nümayiş etdiriblər.
“Pekin Elektron Şəhər Yarımarafonu və Humanoid Robot Yarımarafonu” çərçivəsində keçirilən yarışda humanoid robotlar 21,1 kilometrlik məsafəni tarixdə ilk dəfə olaraq insan yarımarafon rekordundan daha qısa müddətdə qət ediblər.
QHT.az xarici mediaya istinadən xəbər verir ki, yarışda Honor tərəfindən hazırlanmış humanoid robot modeli 50 dəqiqə 26 saniyə nəticə ilə birinci olub. Eyni modelə aid digər robotlar isə 50 dəqiqə 56 saniyə və 53 dəqiqə 1 saniyə nəticələrlə növbəti yerləri tutublar.
Müqayisə üçün qeyd edək ki, kişilər arasında yarımarafon üzrə dünya rekordu Jacob Kiplimo tərəfindən 2026-cı ildə Lissabonda 57 dəqiqə 20 saniyə ilə müəyyən edilib. Qadınlar üzrə rekord isə Letesenbet Gideyə məxsusdur.
Yarış zamanı minlərlə insan iştirakçı əsas istiqamətdə qaçarkən, humanoid robotlar təhlükəsizlik məqsədilə ayrılmış paralel zolaqda hərəkət ediblər. Ümumilikdə müxtəlif şirkət, universitet və tədqiqat qruplarının hazırladığı 100-dən çox robot yarışda iştirak edib.
Ötən illə müqayisədə bu il robotların performansında ciddi irəliləyiş müşahidə olunub. Əvvəlki yarışlarda tez-tez yıxılan və tarazlığını itirən robotların əksəriyyəti bu dəfə daha stabil hərəkət edib və daha yüksək koordinasiya nümayiş etdirib.
Mütəxəssislər qeyd edirlər ki, humanoid robot texnologiyasındakı bu sürətli inkişaf gələcəkdə fövqəladə halların idarə olunması, sənaye istehsalı və sosial xidmətlər kimi sahələrdə geniş tətbiq imkanları yarada bilər.
