Bakı, 22 aprel, AZƏRTAC
Ətraf mühit qrupları ABŞ tarixində ən böyük neft sızması ilə nəticələnən “Deepwater Horizon” fəlakətindən düz 16 il sonra Meksika körfəzində “bp” şirkətinin yeni ultradərin neft qazma layihəsini təsdiqlədiyinə görə Donald Tramp administrasiyasını məhkəməyə verib.
AZƏRTAC “The Guardian” qəzetinə istinadla xəbər verir ki, mart ayında ABŞ Daxili İşlər Nazirliyi bp-nin “Kaskida” kimi tanınan 5 milyard dollarlıq layihəsini təsdiqləyib. Bu layihə 2010-cu ildə 11 nəfərin ölümünə və okeana 3 milyon bareldən çox neftin sızmasına səbəb olan “Deepwater Horizon” qəzasından daha böyük dərinliklərdə qazma işlərini ehtiva edir. Sızma yalnız 87 gündən sonra dayandırılmışdı.
Yeni layihə Luiziana sahillərindən təxminən 250 mil məsafədə həyata keçiriləcək. Qazma avadanlığının təqribən 6000 fut dərinlikdə yerləşdirilməsi planlaşdırılır, bundan sonra qazma işləri xeyli dərinlikdə - ümumilikdə təxminən 6 mil və ya Everest dağının hündürlüyündən daha çox məsafədə davam etdiriləcək.
Məlumatda qeyd olunur ki, bp-nin hesablamalarına görə, 2029-cu ildə hasilat başladıqdan sonra altı quyudan gündə təxminən 80 min barel neft hasil ediləcək. Yatağın ümumi ehtiyatları 10 milyard barel olaraq qiymətləndirilir.
İddiaçı tərəf layihənin ətraf mühit və yerli icmalar üçün ciddi ekoloji risklər yaratdığına inanır. İddia ərizəsində bp-nin qanuni olaraq tələb olunan bütün məlumatları təqdim etmədiyi və “Deepwater Horizon” fəlakəti kimi qəza riskinin artdığı ekstremal dərinliklərdə təhlükəsiz şəkildə qazma qabiliyyətini nümayiş etdirmədiyi bildirilir.
Öz növbəsində, bp layihənin təhlükəli olmasını inkar edir. ABŞ Daxili İşlər Nazirliyinin bir hissəsi olan Okean Enerjisinin İdarə Edilməsi Bürosu (BOEM) davam edən məhkəmə prosesləri ilə bağlı şərh verməyib, lakin “Kaskida” layihəsinin əvvəllər əlçatmaz olan 275 milyon bareldən çox nefti bərpa edəcəyini vurğulayıb.
Tramp administrasiyası ölkənin dünyanın ən böyük karbohidrogen istehsalçısı kimi mövqeyini gücləndirmək üçün Meksika körfəzində, Kaliforniya sahillərində və Arktikada layihələr də daxil olmaqla, ABŞ-də neft qazma işlərini sürətləndirməyə davam edir.
Xatırladaq ki, “Deepwater Horizon” neft dağılmasından sonra ABŞ məhkəməsi bp üçün rekord 20,8 milyard dollar cəriməni qüvvədə saxlayıb. Şirkətin fəlakətin aradan qaldırılması ilə bağlı ümumi xərcləri 53 milyard dolları keçib.
