Sahildən 45 dəniz mili aralıda baş verən hücum artan pirat aktivliyini nümayiş etdirməkdədir...
Poliqon xəbər verir ki, Britaniya Dəniz Ticarəti Əməliyyatları Mərkəzi (UKMTO) Somali sahillərində növbəti pirat hücumunu təsdiqləyib. Məlumata görə, tanker Mareyo şəhərindən 45 dəniz mili şimal-şərqdə naməlum şəxslər tərəfindən ələ keçirilib. Hücumçular gəmini 77 dəniz mili cənub istiqamətində, Somalinin ərazi sularına yönləndiriblər.
Təhlükəsizlik mənbələri regionda pirat qruplaşmalarının fəallığının artdığını bildirir. Son günlərdə bir neçə insident qeydə alınıb: aprelin 20-də Hafun sahillərində Somali balıqçı trauleri, aprelin 21-də isə daha bir tanker ələ keçirilib. Aprelin 22-də "HONOUR 25" neft tankeri qaçırılıb – gəmidə 10 Pakistan, 4 İndoneziya, 1 Hindistan, 1 Şri-Lanka və 1 Myanma vətəndaşı olmaqla 17 nəfərlik ekipaj olub. Dənizçilər təhlükəsiz otağa sığınıblar. Pakistan hökuməti dənizçilərin azad edilməsi üçün danışıqlar aparır.
UKMTO bütün gəmilərə regionda artan təhlükə səbəbindən yüksək sayıqlıq göstərməyi və şübhəli fəaliyyətlər barədə dərhal məlumat verməyi tövsiyə edir.
Poliqon.info
