ABŞ neftinin əsas alıcıları içində Niderland liderdir, Avropa əsas istiqamət olaraq qalır, lakin ixracda müəyyən azalma qeydə alınıb...
ABŞ-nin neft ixracının əsas alıcı ölkələri və bazar dinamikası ilə bağlı yeni məlumatlar açıqlanıb.
Poliqon xəbər verir ki, bu barədə ABŞ Enerji İnformasiya Administrasiyasının məlumatına istinadən Naked Science yazıb. Bildirilir ki, ABŞ gündə təxminən 4 milyon barel neft ixrac edib ki, bu da əvvəlki illə müqayisədə 3 faiz azdır. Bu, son dörd ildə ilk azalma hesab olunur. Eyni zamanda, ölkədə gündəlik neft hasilatı rekord həddə – 13,6 milyon barelə çatıb.
Məlumata görə, ABŞ neftinin ən böyük idxalçısı Niderland olub. Bu ölkə il ərzində təxminən 419 milyon barel neft alaraq ümumi ixracın 10,7 faizini təşkil edib. Həmin həcmin böyük hissəsi Rotterdam limanı vasitəsilə Avropaya paylanır və ya emal olunur.
İkinci və üçüncü yerlərdə müvafiq olaraq Meksika (398 milyon barel) və Kanada (324 milyon barel) qərarlaşıb ki, bu da Şimali Amerika daxilində enerji əlaqələrinin güclü olduğunu göstərir. Siyahıda Cənubi Koreya, Yaponiya, Çin və Hindistan kimi Asiya ölkələri də mühüm yer tutur və bu regionda tələbin davam etdiyini göstərir.
2025-ci ildə ABŞ neftinin əsas idxalçıları aşağıdakılardır (milyon barel ilə):
Niderland — 418,75;
Meksika — 398,14;
Kanada — 323,65;
Cənubi Koreya — 257,35;
Yaponiya — 247,19;
Çin — 237,78;
Hindistan — 221,06;
Braziliya — 132,59;
Böyük Britaniya — 123,73;
İspaniya — 95,11.
Qeyd olunur ki, 2023-cü ildən etibarən Avropa ABŞ neftinin əsas istiqamətinə çevrilib. Bu, əsasən Rusiya neftindən asılılığı azaltmaq siyasəti ilə əlaqədardır. Lakin 2025-ci ildə regiona ixrac təxminən 7 faiz azalıb ki, bunun səbəblərindən biri OPEK ölkələrinin hasilatı artırmasıdır.
Avropa daxilində isə fərqli tendensiyalar müşahidə olunub. Böyük Britaniyada idxal təxminən 35 faiz azaldığı halda, Niderland alışları artıraraq ümumi azalmaya qismən kompensasiya edib.
Asiya və Okeaniya regionlarına ixrac da azalıb. Xüsusilə Çinə və Sinqapura tədarüklərdə ciddi azalma qeydə alınıb. Bu, həm ticarət ziddiyyətləri, həm də Rusiya və İran kimi ölkələrdən daha ucuz neftin mövcudluğu ilə izah olunur. Eyni zamanda, Hindistan və Yaponiya idxalı artıraraq region daxilində tələbin qismən yenidən bölüşdürülməsini göstərib.
Ümumilikdə, 2025-ci ildə müəyyən azalma olsa da, ABŞ neft ixracı tarixi yüksək səviyyədə qalır. 2015-ci ildə ixrac qadağasının ləğvindən sonra ABŞ-nin neft tədarükləri kəskin şəkildə artaraq 2011-ci illə müqayisədə təxminən 85 dəfə yüksəlib.
Poliqon.info
