Avropa Komissiyasının (AK) prezidenti Ursula fon der Lyayen Almaniya kansleri Fridrix Merzin mühafizəkar Xristian Demokrat və Xristian Sosial Birliyi (CDU/CSU) blokunun ultimatumundan sonra dəyişikliklərə hazır olduğunu bildirib.
Musavat.com "Politico"ya istinadən xəbər verir ki, fon der Lyayen dünən Berlində Almaniyanın mühafizəkar blokunun parlament üzvləri ilə ölkədəki biznesə təsir etdiyi bildirilən Aİ qanunlarını müzakirə etmək üçün görüşüb.
Görüşdən əvvəl onlar Aİ prezidentinə təzyiqi artırıblar və Aİ qaydalarının sadələşdirilməsi və azaldılması üçün 27 tələb irəli sürüblər.
AK prezidenti tələbləri qəbul edib: "Biz dəyişikliklərə nail olmaqda qərarlıyıq ki, Avropada və üzv dövlətlərdə şirkətlərin ehtiyac duyduqları qlobal rəqabət qabiliyyətini artıra və inkişaf etdirə biləcəyi bir mühit daha tez və effektiv şəkildə yarada bilək".
Musavat.com
