Azpolitika.az portalından verilən məlumata görə, ain.az xəbər yayır.
Böyük Britaniya kralı III Karl aprelin 28-də ABŞ Konqresinin hər iki palatası qarşısında tarixi nitqlə çıxış edib. Bu, 1991-ci ildən bəri Britaniya monarxının amerikalı qanunvericilər qarşısında ilk çıxışıdır.
“AzPolitika.info” xəbər verir ki, ABŞ-nin müstəqilliyinin 250 illiyinə həsr olunmuş dördgünlük dövlət səfəri çərçivəsində baş tutan bu çıxış mühüm siyasi mesajlarla yadda qalıb.
III Karl çıxışına həm ABŞ-nin, həm də Böyük Britaniyanın üzləşdiyi "böyük qeyri-müəyyənlik dövrü"nə toxunaraq başlayıb. O vurğulayıb ki, Avropada və Yaxın Şərqdə davam edən münaqişələrə baxmayaraq, hər iki ölkə demokratiyanın müdafiəsində sarsılmaz müttəfiq olaraq qalacaq.
Kral çıxışında ABŞ Prezidenti Donald Trampın NATO-ya dair tənqidlərinə də eyham vurub. O xatırladıb ki, 2001-ci il 11 sentyabr terror aktlarından sonra Şimali Atlantika Müqaviləsinin 5-ci maddəsi ilk dəfə tətbiq olunub və Alyans öz üzvünü qorumaq üçün səfərbər edilib. III Karl eyni qətiyyətin bu gün Ukraynanın müdafiəsi üçün də zəruri olduğunu bildirib: "Bu gün həmin sarsılmaz qətiyyət Ukraynanın və onun cəsur xalqının müdafiəsi, ədalətli və davamlı sülhün təmin edilməsi üçün lazımdır".
Kral, həmçinin şənbə günü Ağ Ev müxbirlərinin şam yeməyində baş vermiş atışma hadisəsinə də toxunaraq, bu cür zorakılıq aktlarının heç vaxt öz məqsədinə çatmayacağını qeyd edib.
Rəsmi hissədən sonra kral III Karl və kraliça Kamilla Ağ Evdə keçirilən dövlət şam yeməyində iştirak ediblər. Tədbir zamanı tərəflər arasında səmimi və zarafatcıl mühit hökm sürüb. Kral III Karl ABŞ Prezidentinə Britaniyanın "HMS Trump" sualtı qayığının gəmi zəngini hədiyyə edib.
Kral çıxışında Donald Trampın Ağ Evin Şərq qanadında inşa etdirdiyi mübahisəli yeni bal zalı layihəsi ilə bağlı zarafat edib. Tramp isə öz növbəsində iki ölkə arasındakı "xüsusi münasibətləri" yüksək qiymətləndirib.
Səfər çərçivəsində III Karl amerikalı texnologiya şirkətlərinin rəhbərləri ilə də görüşərək startapların inkişaf mərhələsində qarşılaşdıqları problemləri müzakirə edib.
Qeyd edək ki, bu, 2007-ci ildə kraliça II Elizabetin səfərindən sonra Britaniya monarxının ABŞ-yə ilk dövlət səfəridir. III Karl isə ABŞ Konqresi qarşısında çıxış edən tarixdə ikinci Britaniya monarxı kimi qeyd olunub.
“AzPolitika.info”
Hadisənin gedişatını izləmək üçün ain.az saytında ən son yeniliklərə baxın.
