Yeni bir araşdırma göstərir ki, insan daim xoşbəxt olmağa çalışdıqda, əksinə, özünü daha bədbəxt hiss edə bilər.
Yeniavaz.com xəbər verir ki, bu barədə “Psychonomic Bulletin & Review” jurnalında məlumat dərc olunub.
Araşdırmada insanlar iki qrupa bölünüb. Birinci qrupa tapşırılıb ki, onları xoşbəxt edəcək şeyləri yazsınlar və ya maraqsız bir filmə baxarkən özlərini xoşbəxt hiss etməyə çalışsınlar. Yəni xoşbəxtlik onlara çatmalı olduqları bir məqsəd kimi göstərilib.
İkinci qrupa isə komediya filmi izlədilib və ya artıq onları xoşbəxt edən şeyləri sadalamaq tapşırılıb. Yəni burada xoşbəxtlik artıq mövcud olan bir hal kimi təqdim edilib.
Nəticədə maraqlı bir hal ortaya çıxıb. Xoşbəxtliyi daim çatılmalı bir məqsəd kimi görən insanlar vaxtın az olduğunu daha çox hiss ediblər. Onlara elə gəlib ki, vaxt çatmır. Bu da onları daha çox sıxıb və narahat edib.
Alimlər deyir ki, insan xoşbəxtliyi uzaq bir hədəf kimi gördükdə, ona elə gəlir ki, vaxt tez keçir və çatmır. Bu da insanı yorur və bədbəxt edir.
Amma insan artıq xoşbəxt olduğunu düşünsə, məsələn, sahib olduqlarına şükür etsə, onda vaxt çatışmazlığı hissi azalır və özünü daha rahat hiss edir.
