ain.az, Qaynarinfo portalına istinadən məlumat yayır.
ABŞ Avropadakı müttəfiqlərinə silah tədarükündə uzunmüddətli gecikmələr ola biləcəyi barədə xəbərdarlıq edib. Buna səbəb ölkənin hərbi ehtiyatlarının döyüş əməliyyatları nəticəsində ciddi şəkildə azalmasıdır.
Qaynarinfo xəbər verir ki, bu barədə "Financial Times” yazır.
Nəşrin məlumatına görə, gecikmələr əsasən Böyük Britaniya, Polşa, Litva və Estoniyaya göndərilən silahları əhatə edəcək. Eyni zamanda Vaşinqtonda Asiya ölkələri, o cümlədən Tayvana planlaşdırılan bəzi tədarüklərin də təxirə salınması müzakirə olunur.
Hansı silahlar risk altındadır?
Söhbət HIMARS və NASAMS sistemləri üçün döyüş sursatları və raketlərdən, eləcə də ABŞ müttəfiqləri, o cümlədən Ukrayna tərəfindən geniş istifadə edilən digər kritik silah növlərindən gedir.
Pentaqon yeni tələbləri və mövcud müqavilələri yenidən nəzərdən keçirdiyini təsdiqləyib. Lakin operativ təhlükəsizlik səbəbilə əlavə detallar açıqlanmayıb.
Səbəb – ehtiyatların tükənməsi
Mənbələrin bildirdiyinə görə, əsas səbəb son aylarda İranla yaşanan gərginlik fonunda sursatların intensiv istifadəsidir. ABŞ iki ay ərzində dron və raket hücumlarının qarşısını almaq üçün böyük həcmdə raket və interceptorlardan istifadə edib.
Keçmiş ABŞ rəsmisi Tom Raytın sözlərinə görə, Pentaqon hazırda iki strateji prioritet arasında balans saxlamağa çalışır: Yaxın Şərqdə uzunmüddətli münaqişə ehtimalı və Hind-Sakit okean regionunda çəkindirmə gücünün artırılması.
Nə baş verib?
Bu xəbər fonunda məlum olub ki, ABŞ prezidenti Donald Tramp administrasiyası Konqresdə baxılma prosedurundan yan keçərək Yaxın Şərqdəki müttəfiqlərə – İsrail, Qətər, Küveyt və Birləşmiş Ərəb Əmirliklərinə – 8,6 milyard dollardan çox dəyərində hərbi texnika satışını təsdiqləyib.
Eyni zamanda Tramp İran rəhbərliyinin "xaos və kollaps vəziyyətində” olduğunu iddia etsə də, region üzrə ekspertlər bu açıqlamaları şişirdilmiş hesab edirlər.
Aydın
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
