Hədəfdə raket qurğuları və enerji infrastrukturu ola bilər...
ABŞ və İsrail İranın BƏƏ-yə qarşı hücumuna cavab olaraq bu ölkənin hərbi və enerji obyektlərinə zərbələr endirmək imkanını müzakirə edir.
Poliqon xəbər verir ki, bu barədə İsrailin “Israel Hayom” nəşri məlumat yayıb.
Məlumata görə, mümkün əməliyyat çərçivəsində İranın raket qurğuları və strateji əhəmiyyət daşıyan enerji infrastrukturu əsas hədəflər kimi nəzərdən keçirilir. Bu addımın məqsədi Tehran tərəfindən həyata keçirilən hücumlara qarşı çəkindirici təsir göstərmək və regionda təhlükəsizlik balansını bərpa etməkdir.
Xatırladaq ki, daha əvvəl İranın BƏƏ ərazisinə yönəlmiş hücumları regionda gərginliyin kəskin şəkildə artmasına səbəb olub. Bu fonda Vaşinqton və Təl-Əviv arasında hərbi koordinasiyanın gücləndirildiyi bildirilir.
Analitiklər hesab edirlər ki, belə bir ssenarinin reallaşması Yaxın Şərqdə genişmiqyaslı eskalasiyaya gətirib çıxara bilər. Xüsusilə enerji obyektlərinin hədəfə alınması qlobal neft və qaz bazarlarında ciddi dalğalanmalara səbəb ola bilər.
Ekspertlərin fikrincə, hazırkı vəziyyət regionda qarşıdurmanın yeni mərhələyə keçmək ehtimalını artırır və beynəlxalq ictimaiyyətin diqqət mərkəzində qalmaqda davam edir.
Poliqon.info
