Yeni elmi araşdırma göstərir ki, plastik çirklənməsi təkcə okeanları və təbiəti zəhərləmir, həm də qlobal istiləşməyə birbaşa töhfə verir. Alimlər mikroplastiklərin atmosferdə günəş işığını udaraq istiliyi artırdığını müəyyən ediblər.
QHT.az xarici mediaya istinadən bildirir ki, araşdırma Böyük Pasifik Çöp Sahəsi üzərində aparılıb. Bu bölgə Havay və Kaliforniya arasında yerləşir və ölçüsünə görə Texas ştatından iki dəfə böyükdür.
Mikroplastiklər və nanoplastiklər külək vasitəsilə okeanlardan, zibilxanalardan və təkər aşınmasından atmosferə qalxır. Bu hissəciklər havada uzun müddət qalaraq günəş radiasiyasını udur.
Alimlərin hesablamalarına görə, bəzi rəngli plastiklər şəffaf plastiklərdən 75 dəfə daha çox istilik udur. Bu isə onların iqlimə təsirini ciddi şəkildə artırır.
Tədqiqat göstərir ki, plastik hissəciklərin istilik effekti bəzi güclü çirkləndiricilərin, o cümlədən hisin təsirinin təxminən 16%-i qədərdir.
Mütəxəssislər bildirir ki, atmosferdəki plastik miqdarının dəqiq ölçülməsi çətin olsa da, bu nəticələr iqlim modellərinin yenilənməsinin vacibliyini göstərir.
Araşdırmaya görə, plastik çirklənməsi artıq yalnız ekoloji problem deyil, həm də iqlim dəyişikliyini sürətləndirən əlavə faktordur.
Piranə Xasiyeva
