Vaşinqton və Pekin enerji əməkdaşlığı üzrə yeni razılaşmalar əldə etdiklərini bildirirlər...
Poliqon xəbər verir ki, bu barədə Fox News telekanalına müsahibəsində Donald Tramp açıqlama verib. ABŞ prezidenti bildirib ki, Çin Xalq Respublikasının sədri Xi Jinping Amerika neftinin alınması ilə bağlı təklifi müsbət qarşılayıb.
Donald Trampın sözlərinə görə, tərəflər ABŞ enerji resurslarının Çinə ixracı üzrə prinsipial razılıq əldə ediblər. O qeyd edib ki, Çin gəmilərinin ABŞ-nin əsas enerji bölgələrinə, o cümlədən Texas, Louisiana və Alaska ştatlarına yönləndirilməsi planlaşdırılır.
“Onlar ABŞ-dən neft almağa razılaşıblar. Çindən gəmilər Texasa gələcək, biz Çin gəmilərini Texas, Luiziana və Alyaskaya yönləndirəcəyik. Düşünürəm ki, bu, əldə etdiyimiz razılaşmalardan biridir”, deyə Donald Tramp bildirib.
ABŞ prezidenti həmçinin Si Cinpinlə son görüşünün əvvəlki danışıqlardan daha uğurlu keçdiyini vurğulayıb. Onun sözlərinə görə, əvvəlki görüş zamanı təxminən 36 razılaşma əldə olunmuşdusa, bu dəfə razılaşmaların sayı daha çox olub.
Məlumata görə, Donald Tramp və Si Cinpin sonuncu dəfə 2025-ci ilin oktyabr ayında geniş tərkibli danışıqlar aparıblar. Həmin dövrdə də ABŞ prezidenti Çinin Amerika enerji daşıyıcılarının alınmasına razılıq verdiyini açıqlamışdı. Lakin o vaxt tərəflər arasında rəsmi və hüquqi qüvvəyə malik yekun saziş imzalanmamışdı.
Ekspertlərin fikrincə, Vaşinqton və Pekin arasında enerji sahəsində əməkdaşlığın genişləndirilməsi iki ölkə arasındakı ticarət münasibətlərinə müsbət təsir göstərə bilər. Bununla yanaşı, ABŞ neftinin Çin bazarına daha geniş həcmdə daxil olması qlobal enerji bazarındakı rəqabət balansına da təsir edə bilər.
Poliqon.info
