Redaktor.az portalından əldə olunan məlumata əsasən, ain.az xəbər verir.
Bu günlərdə bir çoxumuz eyni şikayəti edirik: "Artıq nə bir kitabı axıra qədər oxuya bilirəm, nə də iki saatlıq bir filmə fokuslana bilirəm". Əvvəllər saatlarla klassik əsərlərin dərinliyinə qərq olan beyinlərimiz, indi 15 saniyəlik videoların arasında yorulur və hər beş dəqiqədən bir əlimiz qeyri-ixtiyari telefona uzanır. Bəs nə baş verdi? Doğrudanmı beynimiz "çürüyür", yoxsa yeni rəqəmsal ekosistemə adaptasiya oluruq?
Redaktor.az müasir insanın ən böyük koqnitiv böhranını — qısa məzmun asılılığını və onun beynimizdə buraxdığı dərin izləri araşdırır.
Rəqəmsal "fast-fud" və dopamin tələsi
"TikTok", "Instagram Reels" və "YouTube Shorts" kimi platformalar diqqətimizi ovlamaq üçün hazırlanmış mükəmməl mühəndislik nümunələridir. Bu platformaların əsas silahı "anında məmnuniyyət" (instant gratification) prinsipidir. Beynimiz hər yeni videoda kiçik bir dopamin dozası alır.
Uzun bir romanı bitirmək üçün beynimiz "sərmayə" qoymalı, yəni diqqət və zaman xərcləməlidir. Qısa videolar isə bu sərmayəni tələb etmədən bizə hazır "mükafat" təqdim edir. Bu, eynilə sağlam qida əvəzinə hər gün sürətli yeməyə (fast-food) bənzəyir: dadlıdır, sürətlidir, amma uzunmüddətli perspektivdə zehni orqanizmimizi zəiflədir.
"Sürüşdürmə İmmersiyası": İradənin itmə nöqtəsi
Səudiyyə Ərəbistanı kimi rəqəmsal aktivliyin yüksək olduğu ölkələrdə aparılan son tədqiqatlar "Sürüşdürmə İmmersiyası" (Scroll Immersion) anlayışını ortaya qoyur. Bu, istifadəçinin ekranı sürüşdürərkən zaman və məkan duyğusunu itirərək bir növ "trans" vəziyyətinə düşməsidir.
Niyyətsiz başlanğıc: İnsanlar bu platformalara çox vaxt cansıxıcılıqdan və ya 5 dəqiqəlik fasilə üçün daxil olurlar.
İdarəolunmaz sonluq: Alqoritmlər elə qurulub ki, "növbəti video" marağı iradəni üstələyir və biz planlaşdırdığımızdan qat-qat artıq vaxtı ekran qarşısında itiririk.
Beynin üç böyük düşməni
Elmi tapıntılar sübut edir ki, qısa videoların intensiv istifadəsi beynimizin üç əsas funksiyasını hədəf alır:
1. Diqqət çətinliyi və icraedici nəzarətin çökməsi: Beyin davamlı olaraq əlaqəsiz stimullar arasında keçid etdikdə, dərin fokuslanma qabiliyyəti zəifləyir. İcraedici nəzarət sistemi bizə kənar bildirişləri bloklamağa kömək edir, lakin "qısa video" asılılığı bu sistemi sıradan çıxarır.
2. İş yaddaşının pozulması: Videoların sürətli axını beyinə məlumatı kodlaşdırmaq üçün vaxt tanımır. Nəticədə "tıxanmış" və məlumatı emal edə bilməyən bir yaddaş yaranır.
3. İdrak yorğunluğu (Cognitive fatigue): Yüksək intensivlikli vizual və səs siqnalları beyini həddindən artıq stimullaşdırır. Bu, fiziki deyil, zehni tükənmədir.
Bakıdan Nyu-Yorka: Qlobal fenomen və yerli reallıq
Bu problem yalnız Qərbə aid deyil; Bakı metrosunda və ya parklarda gənclərin eyni sürətlə ekranı sürüşdürmə etdiyini görürük. Bizim auditoriya üçün bu, həm də bir növ "informasiya qaçışı"dır. Uzun məqalə oxumaq yerinə, hadisəni 30 saniyəlik emosional videoda görmək daha cazibədar gəlir. Lakin bu "rahatlıq" bizdən analitik düşünmə qabiliyyətimizi alır. Çünki dərin analiz zaman tələb edir, qısa kontent isə yalnız səthi emosiya verir.
Demoqrafik miflər: "Beyin Çürüməsi" hər kəs üçün təhlükədir
İnternet mədəniyyətində zarafatla işlədilən "Brain Rot" (Beyin Çürüməsi) termini əslində koqnitiv yorğunluğu ifadə edir. Araşdırmalar göstərir ki, yaş amili burada həlledici deyil; həm gənclər, həm də orta yaşlılar eyni dərəcədə risk altındadırlar. Sosial mediada saatlarla vaxt keçirmək beynin teta dalğalarını — yəni fokuslanma üçün vacib olan aktivliyi azalda bilir.
Nəticdə diqqəti necə geri qazanmalı?
Yaxşı xəbər budur ki, diqqət bir əzələ kimidir — onu məşq etdirmək mümkündür. Psixologiyada "Diqqətin bərpası teoremi" nə görə, təbiətdə vaxt keçirmək və ya texnologiyasız məşğuliyyətlər beynin yorulmuş mərkəzlərini yenidən canlandırır.
Çıxış yolu texnologiyadan tam imtina etmək deyil, onun bizi idarə etməsinə icazə verməməkdir. Bəlkə də, bu məqaləni bitirdikdən sonra növbəti videoya keçmək əvəzinə, sadəcə 5 dəqiqə pəncərədən çölə baxıb beyninizə istirahət vermək ən yaxşı "rəqəmsal detoks" olar. Beynimiz "yorğunluq" siqnalı verəndə onu dinləmək rəqəmsal sağ qalmağın ilk şərtidir.
Aysu ORUCOVA
Daha ətraflı məlumat və yeniliklər üçün ain.az saytını izləyin.
