BAKI, 30 may. TELEQRAF
Maltada parlament seçkilərində səsvermə başlayıb.
Teleqraf xəbər verir ki, Baş nazir Robert Abela növbədənkənar seçkilərin keçirilməsi barədə qərarı mövcud beşillik səlahiyyət müddətinin dördüncü ilində verib.
O, bu addımı dövlətin qeyri-müəyyən beynəlxalq vəziyyətdən irəli gələn gələcək çağırışlarla üzləşməsi ilə əsaslandırıb.
Rəy sorğularına əsasən, Leyboristlər Partiyası 2013, 2017 və 2022-ci illərdə olduğu kimi, bu seçkilərdə də parlamentdə rahat çoxluq əldə etməyə yaxındır.
Seçki bülletenində altı siyasi partiya yer alsa da, 1966-cı ildən bəri yalnız Leyboristlər Partiyası və müxalif mərkəzçi Milli Partiya parlamentə düşə bilib. Kiçik partiyalar isə adətən səslərin 5%-dən azını toplayır.
Seçkilərin ilkin nəticələrinin bazar günü günorta saatlarında açıqlanacağı gözlənilir.
Qeyd edək ki, Maltanın iqtisadiyyatı Avropa İttifaqında ən yaxşı nəticə göstərən iqtisadiyyatlardan biri hesab olunur. Ölkənin iqtisadiyyatı ötən il 4% artıb, inflyasiya aşağı səviyyədə qalıb və işsizlik demək olar ki, yoxdur. Elektrik enerjisi və yanacaq qiymətləri isə son 10 ilə yaxın müddətdə sabit saxlanılıb ki, bu da onların Avropada ən aşağı səviyyələrdən biri olmasına imkan verib.
