ABŞ hakimiyyəti ABŞ Beynəlxalq İnkişaf Agentliyinin (USAID) bütün xarici ofislərini ləğv etmək və onun proqramlarına nəzarəti birbaşa Dövlət Departamentinə vermək niyyətindədir.
Publika.az xəbər verir ki, bu barədə "Guardian" məlumat yayıb.
"Nəşrin əldə etdiyi Dövlət Departamentinin məktubunda deyilir ki, dövlət katibi Marko Rubio agentliyin bütün beynəlxalq heyətinin ləğvi, xarici yardım proqramlarına nəzarəti birbaşa Dövlət Departamentinə təhvil verməsi barədə göstəriş verib", - qəzet yazıb.
Prosesin sentyabrın 30-da başa çatdırılması gözlənilir və 100-dən çox ölkədə xarici xidmət zabitləri, podratçılar və yerli işçilər də daxil olmaqla, USAID-in dünya üzrə yüzlərlə əməkdaşına təsir göstərəcək.
Xatırladaq ki, USAID fevralın 24-də elan edib ki, Tramp administrasiyası minlərlə iş itkisi ilə nəticələnə bilən işçi qüvvəsinin kütləvi ixtisarına başlayıb. Xaricdə işləyənlər üçün agentlik tamamilə USAID tərəfindən maliyyələşdirilən uçuş proqramı təşkil etməyi planlaşdırır. İşdən çıxarılan bütün işçilər öz ölkələrinə qayıdana qədər agentliyin sistemlərinə, resurslarına və diplomatik kanallarına çıxış əldə edəcəklər.
