Məşhur amerikalı investor və "Berkshire Hathaway" şirkətinin rəhbəri Uorren Baffet son səhmdarlar toplantısında uğurun açarlarından biri kimi insanın ətrafında olan şəxsləri göstərib.
Valyuta.az xəbər verir ki, onun fikrincə, həyatınızda yer alan insanlar sizin inkişaf istiqamətinizi müəyyən edir və onlarla münasibətiniz birbaşa uğurunuza təsir edir.
"Siz bütün qərarları düzgün verə bilməzsiniz, amma həyatınız, ümumilikdə, dostluq etdiyiniz, çalışdığınız və heyran olduğunuz insanların istiqamətində inkişaf edəcək", deyə Baffet bildirib.
Elm də Baffeti təsdiqləyir
Vaşinqton Universitetinin Sent-Luis kampusunda aparılan bir araşdırma göstərib ki, düşüncəli və etibarlı insanlarla münasibətdə olanlar iş həyatında daha uğurlu olur, daha yüksək maaş alır və ümumilikdə işlərindən daha məmnun qalırlar. Alimlər bu keyfiyyətləri “həyat yoldaşının vicdanlılığı” kimi xarakterizə edib və bunun gələcəkdə karyera və gəlir üzərində müsbət təsir göstərdiyini müəyyənləşdiriblər.
Siz seçirsiniz - siz formalaşdırırsınız
Ətrafınızdakı insanlar təsadüfən həyatınıza daxil olmur – siz onlara bu imkanı verirsiniz və onların qalmasına şərait yaradırsınız. Bu isə o deməkdir ki, həyatınız onların istiqamətində yönələcək.
Məsələn, Qərbi Karolina Universitetində aparılmış bir tədqiqat göstərib ki, davamlı şəkildə başqalarının şikayətlərini dinləyən insanlar zamanla özləri də daha çox şikayət etməyə başlayır və bu, onların ümumi əhvalına mənfi təsir göstərir. Bu isə yalnız problemi dərinləşdirir.
Ətrafınız sizi yüksəltməlidir
Baffetin fikrincə, insan özünü inkişaf etdirmək istəyirsə, özündən daha ağıllı, çalışqan, mərhəmətli və emosional cəhətdən güclü insanlarla birlikdə olmalıdır:
"Ətrafınızdakı insanlar sizi daha yaxşı versiyanıza çevirməyə təşviq etməlidirlər. Zamanla siz onların axtarışına çıxmayacaqsınız – onlar sizi tapacaq".
Ağıllı insanlar ağıllı insanları, zəhmətkeşlər zəhmətkeşləri, düşüncəli və xeyirxah insanlar isə özlərinə bənzərləri cəlb edir. Eyni prinsip iş mühitində də keçərlidir: yüksək səviyyəli əməkdaşlar yaxşı rəhbərlərlə işləmək istəyir.
Əgər ətrafınız sizi geri çəkirsə...
Əgər ətrafınızdakı insanlar həyatınızı istədiyiniz istiqamətə yönəltməyə kömək etmirsə, demək, nəyisə dəyişməyin vaxtıdır.
Samir
